Footer

BANNER NEWS: NFA nagsardeng aggatang iti irik ta naibbusen pondo

BANTAY, Ilocos Sur – Insardengen ti National Food Authority ti aggatang iti irik agsipud ta naibbusen ti pondo nga inted ti national government para iti daytoy a gannuat.

Kinuna ni NFA provincial officer Fortunato Bulao a naibbusen ti P5.75 milion a pondo nga inlatang ti gobierno nasional a paggatangda iti irik isu nga insardengda pay ti aggatang iti daytoy a produkto dagiti mannalon.

Kinuna ni Bulao nga adda pammilin  kadakuada a saanda nga utangen dagiti gatangenda nga irik ket agsipud ta awanen ti pondo, yurayda laengen iti isasangpet ti sabali pay a pondo a paggatangda iti irik.

“Bareng no adda pay nayonna tapno tuloytuloy latta ti panaggatangtayo iti irik dagiti appo a mannalon,” kinuna ni Bulao idinto nga impalgakna a nakagatang ti nasao a pondo iti aganay 6,000 bags nga irik.

Kinuna ni Bulao a bassit ti naited a paggatangda a pondo agsipud ta 26,000 bags nga irik ti puntiriada a gatangen iti bulan ti Oktubre.

“Bassit unay ti kantidad a naited ta ditayo pay nagatang uray apagkapat iti puntiriatayo a gatangen a sako ti irik,” kinuna ni Bulao.

Kinuna ni Bulao a pondo ti opisinana pay laeng ti pinaggatangda iti irik ket awan ti katulagan a simrekanda iti provincial government a mangted daytoy iti subsidy kadagiti mannalon.

Idi napan a tawen, ninayonan ti gobierno probinsial iti P1 kada kilo ti panaggatang ti NFA iti irik kas tulongna kadagiti mannalon gapu iti panangdidigra ni Bagyo Pepeng iti Amianan a Luzon a pakairamanan ti Ilocos Sur.

Maysa a memorandum of agreement ti pinirmaan ti gobierno probinsial ken ti NFA a nakaipalaonan ti panangnayon ti immuna iti P1 kada kilo ti P17 kada kilo a paggatang ti NFA tapno agbalin a P18 kada kilo ti presio ti irik.

Ngem kinuna ni Bulao a saan a feasible daytoy a gannuat agsipud ta saanda a nalako dagiti irik a nakibinnuligan ti gobierno probinsial ket nagpukaw daytoy.

Ngem kinuna ti provincial officer a no agboluntario ti gobierno probinsial a mangipaay manen iti subsidy kadagiti mannalon, sisasagana ti opisinana a tumulong.#

Enhanced by Zemanta
Comments are closed.