Footer

Problema ti industria ti tabako, natratar iti dialogo ti NTA, mannalon

CANDON CITY – Maysa a dialogo ti naisayangkat iti nagbaetan ti baro a liderato ti National Tobacco Administration ken dagiti grupo dagiti mannalon tapno matratar dagiti problema mainaig iti industria ti tabako.

Iti nasao a dialogo a naangay iti Candon Civic Center ditoy siudad a dinar-ayan ti aganay 350 a mannalon iti maikadua a distrito, dagiti mayor ken konsehal, barangay officials ken farmer-leaders, naidanon ken ni NTA administrator Edgar Zaragoza dagiti an-anek-eken dagiti mannalon a pakairamanan ti pannakaingato ti presio ti tabako,  pannakaited iti PhilHealth insurance kadakuada, pannakaipaay iti pautang nga addaan iti nababa nga interes ken dadduma pay a problemada iti panagmulada iti daytoy tabako.

Kinuna met ni Zaragoza a tallo a puntos ti kayatna nga iserbisio kadagiti mannalon: ti pannakaingato ti presio ti tabako, pannakaipababa ti magastos dagiti mannalon iti panagmulada iti tabako ken ti pannakapasayaat ti kalidad dagiti bulong ti tabako babaen ti baro a teknolohia.

Idi napalabas a tripartite meeting, P5 laeng ti intuon dagiti traders ken manufacturers iti floor price ti tabako, basbassit nga amang ngem iti P10 kada kilo a nainayon iti floor price ti tabako idi 2008.

Ngem inkalintegan dagiti traders a nupay P5 laeng ti naituon iti floor price, saan a nababbaba ngem P61 kada kilo ti presio a pinaggatangda.

Iti maysa nga interbiona iti radio, kinuna ni Vice Gov. Deogracias Victor Savellano nga isingasingna ti pannakaangay ti tobacco summit iti tinawen tapno maaddaan iti nalawag a  direksion ti industria ti tabako.

Kabayatanna, dinawat ti maysa a farmer-leader kadagiti padana a mannalon na agtitinnulongda a mangpapigsa iti industria ti tabako iti sanguanan dagiti adu a problema a sangsanguenna.

Kinuna ni sangguniang bayan member ti Sinait Bernard Vicente a maysa a medio pakaup-upayan dagiti agmulmula iti tabako dagiti mangmangegda iti radio ken telebision a pannakakontra iti panagtabako ken panagsigarilio, ngem innayonna a segun dagiti panagadal, umad-adu latta dagiti agsigarilio.

“Agkurkurang ti suplay ti tabako ket iti panagkitak, narigat a mapukaw daytoy nga industria,” kinuna ni Vicente.

Kinuna ni Vicente a gannuat ti kabarbaro a liderato ti National Tobacco Administration a papigsaen ti industria ti tabako a pagbibiagan dagiti mannalon iti Kailokuan a pakairamanan ti Ilocos Sur.

Iti immun-una nga interbiona iti media, impalgak ni Zaragoza a kayatna a maingato ti presio ti reject a tabako iti P40 kada kilo.#