Footer

Napapatay a barangay captain, natagtagainepna a nailungon

STO. DOMINGO, Ilocos Sur – Babaen ti tagtagainep, nagballaag ni Patay nga adda dakes a mapasamak ni Barangay Captain elect ti Napo Benito Tolentino, Jr,. Ngem saan a namati daytoy ket biagna ti imbayadna iti dina panangiwayat iti panagannad.

Segun ken ni Joy Riego, asawa ni Tolentino, nadakamat kenkuana ti lakayna a natagtagainepna a sinurot a pinaltogan dagiti lallaki ket nakaluban iti lungon.

Kinuna ni Riego a nasapada a bimmangon idi Oktubre 5 ta agpailida ken ni Tolentino gapu ta adda asikasuen daytoy iti munisipio ket agrubrubbuatdan idi nasarita ti asawana ti dakes a tagtagainepna.

“…Ti laeng nadakamatna, kinalubanda kano iti lungon ket adda lallaki a nangsurot a nangpaltog kenkuana,” kinuna ni Riego bayat ti interbio kenkuana ni Buddy Tambua ti DWRS a naipatangatang iti Barangay Commando Brigada a programa ni Romeo “Jun” Ramos.

Kabayatanna, naipilan ti kaso a murder maikontra ken Jeslie Tugadi, 23, baro, taga-Tayum, Abra mainaig iti pannakapapatay ni Tolentino.

Nailasin ni Riego ti suspek kadagiti naipakita kenkuana a retrato a maysa kadagiti nagkalubbon iti motorsiklo a nangisayangkat iti pammapatay.

Napaltogan ni Tolentino bayat ti panagdaliasat ti luganda, kaduana ni Riego ken ti uppat ti tawenna nga anakda, iti national highway a sakup ti Barangay Baconero, Sto. Domingo, Ilocos Sur.

Dagus nga impatay ti biktima ti sugatna iti ulo a gapuanan ti cal. 45. Saan a naan-ano da Riego ken ti anakda malaksid iti garumiad iti rupa ni Riego ken ti kammuol iti muging ti ubing gapu iti pannakatumba ti luganda kalpasan ti pammaltog.

Sumangsango ni Tugadi iti kaso a murder mainaig iti pannakapapatay ni Cyril Gomez, Singaporean national, iti uneg ti Newborn Hardware Store iti Vigan City idi Mayo 23, 2010.

Nabigbig ni Tugadi a nangpaltog ken ni Gomez babaen ti recording ti CCTV camera a naikabit iti uneg ti pagtagilakuan.

Mapapati a nainbolbar pay ti suspek kadagiti dadduma nga insidente ti pammaltog.#