Footer

P22-M, nailatang para mannalon ti tabako

VIGAN CITY – Tapno matulongan dagiti mannalon iti daytoy a panagtatabako, nangiyalokar ti gobierno probinsial iti nasurok P20  milion a maipautang kadakuada.

Kinuna ni Savellano nga adu ti pakaiyalokaran ti pondo manipud iti RA 7171 ket diskarte dagiti mayor, probinsia ken distrito ti pakaipananna ngem iti biang ti gobierno probinsial, inlatangna ti P22 milion a maipautang kadagiti mannalon tapno adda aramatenda iti panagmulada iti tabako.

Kinuna ni Vice Governor Deogracias Victor Savellano a naited ti pondo iti Nueva Segovia Consortium of Cooperatives ken iti Land Bank of the Philippines a mabalinda a pangalaan.

Segun ken ni Savellano, adda bassit requirement tapno ma-avail dagiti agmulmula iti tabako tapno maprotektaran ti nasao a pondo ken saan nga agbalin a doleout.

Adda 5% nga interes para iti maipautang kadagiti agmulmula iti tabako a no ar-arigen, 0% interes gapu iti kababana, inyunay-unay ti bise gobernador sana innayon a ti interes ket maigapu ta adda met dagiti personnel ti kooperatiba a mangproseso iti loan.

“Once a doleout, di agbayag, awanen ti pondo ket mangiyalokar manen ti gobierno probinsial. Ngem no adda institusion a pangalaanda, nasaysayaat ti pannakamaneharna ket aramaten dagiti mannalon ti utangenda para iti talaga a pakasapulanda,” kinuna ni Savellano.

Kabayatanna, kinuna ni National Tobacco Administrator Edgar Zaragoza a mangipaay ti opisinana iti libre a bukel ti tabako nga ibunubon dagiti mannalon, nangruna dagiti nadidigra ni Bagyo Juan.

Segun ken ni Zaragoza, nagdalan ti bukel nga iwaras ti NTA iti baro a teknolohia.

Impalgak pay ti kabarbaro a mangidaulo iti NTA a kayatna a maingato ti presio ti reject a tabako iti P40 kada kilo.

Nangangay itay nabiit ni Zaragoza iti consultative dialogue kadagiti mannalon iti probinsia tapno tratarenda dagiti problema dagiti agmulmula iti tabako.#

Comments are closed.