Footer

ITI INDAYON NI LAGIP: Dagiti natarumamis a siit iti dalan (Maikatlo a paset)

“Kasanokan no agbunga ti aramidenyo? Laglagipem koma dagiti mangnamnama a dadakkel ken kakabsatmo iti inka panagturpos,” impalagip ni Manang Evelyn.

Simmukay iti panunotko ti buya iti awaymi. Da tatang ken inang a kakaasi a makisiksikka ken makiraraep iti ayatda nga adda ipatulodda a kuarta kaniak. Sangkakelleng a battit ti taltalonenda isu a nagawatda pay iti sabali. Isursuratda ti rigatda a mangdengdengngep ti naidalamadam a nisnis wenno anguyob kadagiti tarindanum ken rarasada. Parbangonenda ti umulog iti balaymi a mapan iti talon tapno agmula ken agsibug iti mulada a tabako, bawang wenno kapas. Inut ti amin nga inut, salimetmet iti amin a salimetmet ti ar-aramidenda tapno makaurnongda iti ipaw-itda kaniak.

Diak nagawidan ti panagtedted ti luak. A, maas-asiannak kadagiti dadakkelko. Dakkel unay ti sakripisioda gapu kaniak, iti ayatda a makadalak.

“Arapaapmi a makaaonka iti kinarigat, anak, isu nga ikarigatanmi nga ibaklay ti panagbasam,” nakuna ni tatang idi parubbuatandak nga agpasiudad. “Sapay koma ta dinakami paayen.”

“Wen, ‘tang, agbasaak. Kayatko nga akkalenkayo iti kinapanglaw,” inkarik kenkuana sako inarakup iti nairut.

Ngem ita, mariknak a kasla bakbaklayek ti dagsen ti lubong gapu iti kiddaw ni Jason.

“Dimon maipagpannakkel ti kinataom no naalanan ti kinabirhenmo. No patgam maminsan, kanayonenna dayta. No agsikogka? Di pay ket dika makaturposen?” nagtimek manen ni Manang Evelyn.

Diak nagtimek.  A, diak ammo ti aramidek!

NAGKIRIRING ti telepono. Ni Janet ti simmungbat.

“Myrna, para kenka.”

Inawatko ti telepono. Ni Jason.

“Inton bigat, wen?”

“J-jason, awan kadin ti sabali a kiddawmo a saan a dayta?”

“Natural laengen ti agayan-ayat ti dayta a banag, saan? Aglalo itoy a panawen.”

“Maamakak iti daytoy a kidkiddawem kaniak.”

“Dika madanagan. Dika baybay-an. Ken adda  insaganak a tabletas a tomarem. Napigsa kano dagitoy.”

Natangadko ti asul a bobeda ti salas.

“Sige, awagankanto manen no bigat,” imbaban ni Jason ti telepono.

Nabayag a minulenglengak ti auditibo. Mangnamnama ni Jason nga itedko ti kinababaik. Kasanon?

Kabigatanna, anibersario ti ayan-ayatmi. Immawag ni Jason nga agur-urayen iti Melvin Jones Grandstand. Alas singkon iti malem, segun ti relo iti pungupungoak.

Sakbay a rimmuarak,  pinatibker ni Manang Evelyn ti riknak.

“Kabaelam dayta,” kinunana. Ti panangpaayko iti kiddaw ni Jason ti kayatna a sawen.

Tung-ed laeng ti insungbatko.

Tung-ed ken isem met ti impasabat ni Jason kaniak. Pinetpetanna a dagus ti kannawan a dakulapko. Inakaynak a napan nagtugaw iti karuotan iti asideg ti lagoon.

“Nasapa pay. Urayenta a sumipnget sata mapan iti otel,” inyarasaasna iti puon ti lapayagko.  Nariknak ti agekna iti tengngedko  ket nagkarayam ti bara ti bibigna iti sibubukel a kinataok. Napakidemak ta mariknak a kasla malmesak.

Inruarna iti bulsa ti diaketna a maong ti sangapakete a kumunig a tabletas.

“Maysa laeng ti tomarem kadagitoy iti inaldaw, libretan iti aniaman nga oras a kayatta,” kinunana sana impapetpet ti pakete.

(Maigibusto)

Comments are closed.