Footer

SARITA: Kas iti panawen (Maikapat a paset)

Dimmikar ti kinaduldogmo – daydiay nangisit a paset ti kinataom ket inatipam ti inaunaam idi ipisokna koman ti ikan iti alatna.

“Hep, agurayka, a! Makinkukua dayta?” intudom ti agkalkalawikiw ti ipusna nga ikan.

“Siak a, siempre, ta siak ti nakabanniit, di kadi?” kinunana.

“Rong mistek!”

“Ania ti kayatmo a sawen?”

“Makinbaniit ti nakaala?”

“Sika! Binulodko…”

“Di kukuak ngarud ta banniitko ti nakaala, saan?”

“Badarong, papang, badarong!” Maysa nga expression manipud iti corrupted English a “bad the wrong,” manipud kadagiti slanguage dagiti taal nga agtutubo iti Baguio.

“Apay ketdin a badarong?”

“Asino ti nakabanniit?”

“Sika! Binulodmo laeng ti banniitko…”

“Kukuak a, ta siak iti nakabanniit!” nadagsen ti panangibalikasna.

Kimmaro ti buangger ti kinaduldogmo. Ginandatmo nga agawen ngem naglisi.

“Awan kinnastaan a, papang! Agparbengka met, a! Siak met ti nakaala.”

“Itedmo kadin ta dinak kantiawan ni mamangmo,” impudnomon.

“Okey, sukatak iti dua…” imbargenna idi naawatanna ngata ti situasionmo.

“Diak kayat. Dayta ti kayatko.”

“Uray idtam! Diak met kayat. Daytoy met ti kayatko.”

Nakudkodmo ti di nagatel a tuktokmo. Naisipmo a narigatmo gayam nga utekan toy anakmo. Ngem ti apuy ti kinaduldog, dumakdakkel kabayatan a mayabyabyaban.

“Hep, agurayka. Dimo pay yalat. Jack en poy laengen tapno awan ti adu a riri.”

Uray la nagtayyetayyek dagiti bukelbukel dagiti matana kabayatan a nanglangit. Indissona ti agkulkulipagpag nga ikan iti awan pay sangametro iti ngarab ti tangrib. Insaganana ti gemgemna. Jack en poy. Namindua a nagpadakayo. Iti kapamitlo, papel kaniam idinto ta getteng kenkuana.

“Naabakka, papang! God is a wise judge; I received poetic justice!”

Ngem naputed ti paggaakna idi adda nanabsuok iti danum. Ti ikan!

Dua nga imam ti pinangkudkodmo iti tuktokmo. Ginandatmo pay ti tumapuak tapno kemmegem ti ikan, ngem nagballigi ti nalimbong nga utekmo. Nakadakdakkel ti sakuntip ken ngilangilmo ket uray la agpallayog itan dagiti imam nga agkatek. Saanmo nga ammo ti aramidem. Nginarietam nga impungot ti pangulotem samo inkurakuraykay. Dakkel ti babawim ngem naladawen.  Awan ti umuna a babawi no di maudi.

“Basolmo, papang. Nagadunto la ngamin nga argumentom. Isu ngata a napalusposam ti panagpadim ta napalusposam pay ti kasla tammudo nga ikan…”

“Ayye, no nagpadiak, addaka koma ita nga agbambanniit ditoy beautiful lubong, ala man? Di met ngarud mabalin nga agasawa ti padi a Katoliko?”

Saan a nagtimek ti inaunaam ta sirsiripen ken is-isemanna dagiti nabanniitanna iti uneg ti alatna. Naiduma man iti kinaragsakna ta naaddaan iti sabali nga eksperiensa a maiduma kadagiti eksperiensana iti siudad. Ti eksperiensa ti kalalaingan amin a titser kadagiti adal iti biag a di masursuro iti uneg iti eskuelaan ken iti pagtaengan.

Ti panagbanniit? Kameng ti Pine Tree Mountain Bike Association iti komunidadyo ket no awan serrekda iti eskuela, masansan nga agbisikletada a mapan agbanniit sadiay Ambuclao wenno Binga dam, kadagiti dan-aw iti Benguet a di pay sinabidongan ti rugit dagiti minasan.

“Itunokla ya sira tayo amay na’lam, Junjun. Wala la met, kien, bugguong Lingayen tan perres. Gabay mo?” kinuna ti inada a nakaranraniag ti maratimmukelen a rupana a mangsirsirip ti alat-agsagap. Salsaludsodenna no itunoda laeng ti naala ni Junjun.

Rinukobam ketdi a minulagatan ti buridekmo nga agtawen iti lima ta tangtangadennaka, kudkudkoden ti kannawan nga imana ti tuktokna idinto nga ap-apirasen ti kannigidna ti labus a buksitna.

Kellaat, kinuna ti buridek: “Di man la naasian ni papang! Daddadakkel pay ‘giti janitor fish iti aquariumko ngem dagitoy a nabanniitanna. Isublik laengen ida iti danum, ‘pang, kaasida met…”

Naipugsom ti kabkabukabem a carrot cake iti dayta a nangngegmo. Inillekannaka ni baketmo, sana sinipat ti kannawan nga abagam, ken  induron pay.

“Sidanto laengen ni Britney. Kaay-ayona dagiti kakasta a size ta maminsan laeng a sikbabna…” imballaet ti inaunaam a babai. Ti pusa a tarakenna ti kayatna a sawen. Kimmarayo idi nagrubuatkayo ket inubbanan nga inlugan iti segunda mano nga L200 pick-up.

Para ayup laeng ti nagrigrigatam? Ngem, ala, adda met maitedna a ragsak. Naim-imbag daytan ta saan laeng a tao no di pay ayup ti agragsak.

(Adda tuloyna)

Comments are closed.