Footer

Bimmagsol iti kalugaranna, naisaklang iti prosecutor’s office

VIGAN CITY – Naisaklang iti  provincial prosecutor’s office ti maysa a baro agsipud iti panangbagsolna iti kalugaranna iti barangay Mindoro ditoy siudad idi rabii ti Nobiembre 14 iti barangay Mindoro ditoy siudad.

Naisaklang iti frustrated homicide ni James Garcia y Riosa, 23, baro, residente iti nadakamat a lugar maigapu iti panangbagsolna ken ni Glenn Dennis Altares y Palcon, 44, baro, kalugaranna.

Iti panagimbestiga dagiti nagresponde a polis, naammuan a nagramut ti pammagsol idi mapapati nga impukkaw ni Eduardo Altares ti “maniakis, maniakis” idi lumabas da Garcia ken maysa a kaduana a nainaganan a Dave Abinola y Riparip, 20, baro.

Mapapati a sinurot pay ni Eduardo Altares ti suspek a nagtungpal iti panagbinnara ken panagdinnanogda ngem naanawa dagitoy.

Segun pay iti report, napan binirok da Glenn Dennis ken kakaduana ni Eduardo Altares ngem dita metten a dimmarup ni Garcia a nakaiggem iti dua nga immuko sana binagbagsol ni Glenn Dennis a nakasugatan ti nadumaduma a paset ti bagi daytoy.

Kabayatanna, maysa met a pammagkong iti Barangay Anonang Menor ti naireport iti polis idi rabii ti Nobiembre 16 a nakasugatan ken nakaiyospitalan ti agassawa.

Naitaray iti Gabriela Silang General Hospital da Nilo Alvino y Lupiga, 48,  ken ti asawana a ni Gemma, agpada a residente iti nadakamat a barangay para iti pannakataming dagiti sugatda.

Nainaganan ti nangbagsol kadakuada a da Jun Queypo ken Edgar Queypo, kalugaran dagiti biktima.

Iti inisial nga inbestigasion dagiti polis, agpapatang da Nilo, kaduana ti asawana ken kayongna nga Arman Padre iti sanguanan ti maysa a tienda idi kellaat a dimmarup dagiti suspek sada binagbagsol ni Nilo a nakasugatan ti sumagmamano a paset ti bagina.

Nasugatan met ti makannigid nga abaga ni Gemma  iti panaganawana.

Nagtaray a naglibas dagiti suspek kalpasan ti pammagsol.

Mapapati a dati a susik ti motibo ti pammagsol.#

Comments are closed.