Footer

EDITORIAL: Manmano dagiti addaan iti nabalitokan a puso

Iti daytoy a panawen a nagbalinen ti tao a materialistiko, kayarigan daytoy a babai ti arbis iti agmatuon nga ingget dagaang. Dayta ni See, In-Kyung Kim, South Korean a propesional a tennis player.

Itay nabiit, nangabak daytoy agtawen iti 19 a tennis star iti Lorena Ochoa Invitational para iti maikatlo a titulona iti LPGA Tour nga agdagup iti $220,000 (nasurok a P9,200,000). Ngem saan a nakapapati ti simmaruno nga inaramidna: indonarna amin nga inabakna iti charity!

Iti pannakiuman ti media kenkuana, kinuna ni Kim a maited ti kagudua ti inabakna iti charity ni Lorena Ochoa a maysa met a nalaing a propesional a tennis player ken ti kagudua iti sabali pay a charity iti United States.

Impalgak ni Kim a timmabuno iti party ni Ochoa para kadagiti ubbing ket nakitana dagitoy a tultulongan ti tennis star babaen ti impasdekna a foundation. Iti dayta a kanito, inkeddeng ni Kim a no mangabak iti nakisalipanna nga invitational tour, itedna amin a premiona kadagiti tattao a makasapul iti tulong.

No ukagen ti napalabas ni Kim, makita no apay a kayatna met nga ibinglay ti grasia nga uk-ukkonenna. Inannugot ni Kim a tinartarigagayanna ti mapan agadal iti United States idi agtawen iti 16 ngem saan a kabaelan dagiti nagannak kenkuana agsipud ta saanda met a nabaknang  ken bassit ti matgedanda. Ngem adda maysa a tao a nangtulong kadagiti dadakkelna ken iti pannakaipatulodna iti US.

“… if he didn’t help my parents, or if he didn’t help me coming to the US, I wouldn’t really be here.  Everyone needs help. I think that’s why I’m all about that.”

Adu metten ti nadamdamagmi a  nagidonar kadagiti inabakna, ngem saan nga amin ken saan a kasta ti kadakkelna ken saan a kasta kaubing a kas ken ni Kim.

Agpayso, adda maysa a tao a nangtulong kenkuana iti ipapanna iti US. Babaen ti tulong daytoy di nainaganan a Samaritano,  nagun-od ni Kim ti tarigagayna nga agadal iti US ken maaddaan iti naraniag a masakbayan. Ngem kaadduan iti kasta a kaso, agpatingga lattan ti panagyaman iti nakautanganda iti naimbag a nakem. Kaadduanna nga umdas lattan ti panagsubadda iti tao a nangted kadakuada iti gundaway a lumung-aw iti biag.

Daytoy ti pakaidumaan ni Kim. Saan a ti laeng nakautanganna iti parabur ti pagsubadanna no di inragpinna nga  ibinglayan iti balligina amin dagiti tattao a makasapul iti tulong.

Manmano ti kas ken ni Kim. Naisalsalumina a babai daytoy a tennis star. Immawat iti sangatasa nga imbag, insublina ti sangasalup a grasia.

Umadu koma ti kas ken ni Kim.#

Comments are closed.