Footer

ITI INDAYON NI LAGIP: Dagiti natarumamis a siit iti dalan (Maudi a paset)

Napakidemak  idi immalditna ti agek iti lengngesko. Mariknak ti beggang a mangrugin a mangaron iti kinataok. Idi agkanna ti bibigko, nagtunglabak.

“Intan,” inyarasaas ni Jayson.

Napamulagatak. Kasla nabuyatannak iti nalamiis a danum. Kellaat, nagminar iti panunotko dagiti dadakkelko idi ituloddak iti estasion ti Partas.

“Anak, adu dagiti pannubok a sarangtem sakbay a matungpalmo ti arapaapmo. Adu dagiti sulisog iti daliasatem a dalan. Agmaymaysakanto a mangsango kadagitoy ta addakami iti adayo, saandaka a dagus a mabadangan. Addanton kenka a mangikeddeng no ania ti umisu a turongem iti biag…” nagallungogan iti layapagko ti timek ni tatang.

“Saanka nga agbuteng, ay-ayatenka… ay-ayatennak met saan?” kinuna ni Jayson.

Intulokko a tulongannak a tumakder. Immangesak iti nauneg. Inangayko amin a pigsa ken tangken ti pakinakemko. Idi arakupennak manen, rimmuk-atak.

“Sorry, Jason, diak kabaelan nga ited ti kiddawmo.”

Pinerrengnak,

“Dinak kadi ay-ayaten?”

“Ay-ayatenka, Jason. Ngem sika ti saan a mangay-ayat kaniak. No pudno nga ay-ayatennak, dimo koma gamgamen no di ket dayawem toy bagik. Kakaisuna a gamengko ti kinabirhenko.”

“Natural laengen ita iti agayan-ayat ti … ”

“Iti panirigam. Ngem diak pay naalian iti dayta a banag. Diak umayon iti premarital sex. Ay-ayatenka unay-unay, Jason. Naragsakak iti umuna a tawen ti anibersariota. Ngem sori, diak mapatgan ti kiddawmo…”

Nagsakuntip ni Jason ket limmidem ti rupana.

“Nagrigatka met a kasarsarita,” nakunana. “Dayta la a kiddawek, dinak la ketdin pagustuan.”

“Katimbeng ti dayawko ti kidkiddawem. Inkarik iti bagik nga isagutko ti kinabirhenko iti lalaki a mangikallaysa kaniak iti altar.”

“Agtarayta ngaruden! Agkasarta iti hues!

“Diak maaramid dayta. Kayatko ti makaturpos nga umuna iti panagadalko.”

Kellaat, inarakupnak ni Jayson. Inagkannak iti napaut.

Naggulagolak. “Raemem koma ti kinababaik,” nakunak.

“Agindidika pay laeng,” nakuna ketdi ni Jayson ket pinanggepnak manen nga arakupen.

Timmayab ti dakulapko ket nanalpaak ti pingpingna.

“Nagbaba metten ti panagkitam kaniak! Dinak gayam ammo a raemen!” nakunak. “Sayang, nagngato pay met ti panagkitak kenka. Saanka gayam a maikari iti ayatko!”

Saankon nga inuray ti sungbatna. Timmarayakon nga immadayo. Pinukkawannak ngem saankon nga intaltalek.

Sinangsangitak ti panagsinami. Isu ti umuna nga ayatko ket tinagisaemko ti nagbanagan ti sinangalmi nga ayat.

Saanen a simmarungkar pay ni Jayson iti kaserak. Uray iti pagadalan, dinak payen taliawen no agsabatkami. Idi agangay,  nadamagko laengen nga addan sabali a nobiana.

Inggaedko ti nagbasa. Adda dagiti immar-arubayan nga ayat ngem saankon nga intaltalek.

Idi addaakon iti maudi a semestre, simmardeng nga ageskuela ni Jason. Nadamagko laengen a pinikot ti kaayan-ayatna gapu ta nasikoganna.

Nagpanaas ti pusok. Naukritan manen ti sugat. Ngem imbes a daytoy ti nakaupayak, ad-adda itan a napigsaak iti aniaman a dumteng a pannubok kaniak.

Nabayag daydin a napasamak. Ngem, sibibiagda a ladawan ti napalabas. Ladawan a dinto mapunas iti panaglabas ti panawen ta pasetda iti kinataok ken kinaasinok. Diak nga intulok toy bagik nga ibalatnak ti saem ken pannakapaay ken ayat.

Ita, no agsarakkami ken ni Jason a maysan a drayber iti traysikel drayber iti ilimi, dina maiperreng dagiti matana. Adun ti limmakayanna. Ni Sonia a baketna, nakuttong ken nabakbaket met nga adayo ti langana ngem ti tawenna .Ania ngarud, ket uppaten ti ilanglangoyda iti biag.

No dadduma, umapon iti mugingko a siak koma ita ti adda iti biang ni Sonia no pinatgak ti kiddaw idi ni Jason. Saanak koma itan a prinsipal.

Ken nalabit, diak koma met naam-ammo ni Romeo Versoza. division supervisor ditoy probinsia: nasingpet, naanus ken managayat nga ama da Jenny, computer engineer ken agtrabtrabaho idiay Taiwan, Joyce, kairuruarna ti Licensure Examination ken agisursuro iti pribado nga eskuelaan; Wilmer, graduating iti civil engineering; ken Romeo, Jr., eskolar idiay U.P. Los Baños a pangal-alaanna iti Veterinary Medicine.#

Comments are closed.