Footer

SALAYSAY: Boksing: brutal nga sport (Umuna a paset)

Iti panagboksing da Manny Pacquiao ken ni Antonio Margarito idi Nobiembre 13 (Nobiembre 14 ditoy pagilian) iti Dallas Cowboy Astrodome, linulona ti rupa ti Mehikano a boksingero iti kasta unay gapuna a saan payen a nagparang daytoy iti post interview kalpasan ti panagrupakda iti ring no di nagderetso iti ospital tapno mataming dagiti sugatna iti rupa. Kinuna dagiti doktor a nangkita kenkuana a kasapulan ti surgery tapno matarimaan ti nadadael a tulang  ti socket ti makannawan a matana.

No saan a masigud a matarimaan daytoy, maapektaran ti panagkita ni Margarito. Segun iti maysa a medikal a grupo, makapadas ti boksingero iti doble a bision ken maaddaan iti problema ti panagkuti ti bukelbukelna no saan a sigida a matarimaan babaen ti surgery.

Adu ti nangbabalaw iti referee no apay a pinatuloyna ti pannakirupak pay ni Margarito idinto a nagkeppeten ti makannawan a matana ket saannan a makita dagiti disnog ni Pacquiao ken iti kaadu dagiti nadagsen a danog a naidisso iti rupana. Uray ni Pacquiao, namindua wenno namitlo a kinitana ti referee tapno pasardengennan ti pannakalulo pay ti rupa ni Margarito. Kinuna pay ni Freddie Roach a rumbeng koman a pinasardeng dagiti adda iti corner ni Margarito ta posible a madangran daytoy.

Ngem kinuna kano ni Margarito a maysa a Mehikano, ket makirupak agingga a sitatakder.

Iti udina, simnek ti asi ni Pacquiao ket tinengngelna dagiti disnogna iti maudi a rikos iti baet dagiti ikkis ken durog dagiti mawaw iti dara nga agbuya a patumbaenna ni Margarito.

Posible a maimbagan ni Margarito babaen ti surgery. Ngem dakkel ti posibilidad nga  irekomenda metten dagiti doktor ti panagsardengnan a makiboksing. No agtuloy pay, amangan no ad-adda a madangran ti matana nga agtungpal iti panagbulsekna.

Ngem iti daytoy kaudian a rupak ni Pacquiao, naminsan pay a napaneknekan a brutal nga sport ti boksing ket adu a boksingero ti agtungpal iti nakaay-ay-ay a kasasaad gapu kadagiti disnog a lak-amenda tunggal sumangoda iti uneg ti ring. Atiddogen ti listaan dagiti boksingero a natay wenno nasapa a nakettel ti naraniag a masakbayanda iti daytoy nga sport gapu ta nagannaan ti bagi ken panunotda gapu kadagiti linak-amda a danog bayat ti pannakirupakda iti ring.

Madakamattayo ditoy ni Mohammad Ali, ti maibilang a maysa kadagiti kalaingan a boksingero idi kabambannuaganna.

No makitam ita ni Ali, saanmo a patien a daytoy idi ti boksingero a rinaraem dagiti rinibribu a tattao gapu iti siglat ken pardasna a dumanog ken mangsalasala iti kaboksingna.  Ita, agsagsagaba ni Ali iti Parkinson’s Syndrome, maysa a neoroligical a kasasaad a nangapektar iti kontrolna iti panaggunay ken panagsaona.  Gapu iti daytoy  sakit, saanen a makabalikas unay ni Ali, saan payen a makapagna no awan ti mangakay kenkuana, dina malapdan ti panagtigerger ti imana.

Nupay saan a kumpirmado, adu ti agkuna a naalana daytoy gapu kadagiti linak-amna a nadadagsen a danog iti uneg ti duapulo a tawen a pannakiboksingna.

Mangdakamattayo pay kadagiti sumagmamano a Filipino a boksingero a nadadael ti masakbayanda iti boksing ken iti pay biagda gapu ta nagannaan ti bagida maigapu iti pannakiboksingda.

Natay ni Lito Sisnorio, boksingero a Filipino a kampeon iti superflyweight youth division gapu kadagiti dunor a linak-amna iti naudi a pannakiboksingna ken ni Chatchai Sasakul, maysa a Thai boxer. Ti makadakes, saan nga inaprobaran ti Philippine Games and Amusement Board ti pannakiboksingna. Naitaray ni Sisnorio iti ospital iti Thailand ngem saan a nagballigi ti naiwayat a brain surgery kenkuana ket pimmusay.

Karaman pay iti listaan dagiti natay da Andy Balaba, Macky Silvano, Roger Espineli, Eugene Barutag, Mateo Baring, Eman Juarez, Ferdie Gimay, Maruel Zayas idinto a nasapa a napungtil ti masakbayanda a boksingero gapu iti injuries a linak-amda iti ring da Pretty Boy Lucas, Sonny Boco, fernando Piccio, Alvin Felisilda ken Ayon Naranjo.

Idi Nobiembre 13, 2009, kinarupak ni Z Gorres ni Luis Melendez a nangabakanna babaen ti nagkaysa a puntos. Ngem kalpasan laeng ti sumagmamano a minutos kalpasan ti pannakaiwaragawag ti panangabakna, natuang ni Gorres iti ring ket naitaray iti ospital a nakaidda iti stretcher. Naipakat ti surgery gapu iti pannakadunor ti makannigid a paset ti utekna. Nakaungar ni Gorres ngem gapu iti daytoy a dunorna, naputed ti rumanraniag a masakbayanna a kas boksingero.

Kas ken ni Gorres, kaadduanna dagiti nadakamat iti ngato ti sumingsingising a  Filipino a boksingero. Addaanda iti gupit ken siglatda nga agbalin a nalaing a boksingero ken posible a makasungkit iti korona iti sangalubongan. Ngem nasapa a nakettel dagitoy a namnama ken arapaap gapu kadagiti linak-amda a “pannakadusa babaen ti danog” iti uneg ti ring.

(Adda tuloyna)

Comments are closed.