Footer

SALAYSAY: Boksing: brutal nga sport (Maikadua a paset)

Saan laeng a ditoy pagilian ti pakapaspasamakan dagiti boksingero a madangran iti uneg ti ring. No ukagen ti rekord iti boksing, adu dagiti boksingero, kaadduanna kadakuada ti mangrugrugi pay laeng a mangikur-it ti naganda ti naaddaan iti rikki iti salun-at, panagpampanunot ken panagkitada no di pay nakettel ti biagda gapu kadagiti sinagrapda a dunor iti nadumaduma a paset ti rupa ken uloda iti uneg ti ring .

Mangdakamattayo ditoy kadagiti boksingero a natay iti ring wenno kas resulta iti pannakiboksingda kas naresertstayo iti internet.

Natay ni Jimmy Doyle, maysa a welterweight, gapu iti dunorna iti utek kalpasan ti panangpaturog kenkuana ni Sugar Ray Robinson idi pinadasna nga agawen ti korona daytoy idi 1947. No apay a napalubosan a nagtuloy a nakiboksing ti narigat a maawatan agsipud ta nagsagaba daytoy iti nakaro a dunor iti ulona apagsurok laeng a makatawen sakbayna idi nakiboksing ken ni Artie Levine.

Idi 1963, natay ni Davey Moore kalpasan a natuang iti pagsukatanna kalpasan nga inabak ni Ultiminio Ramos iti panagboksingda para iti titulo ti featherweight iti sangalubongan.

Idi 1969, pimmusay ni Ulrich Regis kalpasan ti pannakaoperana tapno maikkat ti dara a nagbalay iti utekna. Ni Joe Bugner ti nangparmek ken ni Regis.

Idi 1980, natay ni Johnny Owen kalpasan ti innem a lawas a panagtalinaedna iti coma kalpasan ti panangabak kenkuana ni Lupe Pintor para iti World Boxing Council bantamweight championship.

Idi 1982, saanen a nakapuot ni Duk-koo Kim kalpasan a naitaray iti ospital a nakaidda iti stretcher. Nagrupakda ken ni Ray Mancini para iti lightweight title iti babaen ti World Boxing Association. Pimmusay ni Kim kalpasan ti uppat nga aldawna iti ospital.

Idi 1991, natay ni Patrick Diniso, 22, South African a featherweight, kalpasan a pinaturog ti kinasangona iti ring.

Idi 1994, natuang lattan ni Wangila Napunyi kalpasan a nagsagrap iti adu a danog manipud ken ni David Gonzales. Natay ni Napunyi kalpasan a naopera tapno maikkat ti nagbalay a dara iti utekna.

Idi Septiembre 17, 2007, dinependeran ni Leavander Johnson ti koronana iti lightweight division iti babaen ti International Boxing Federation (IBF) maikontra ken ni Jesus Chavez. Naabak babaen ti puntos ni Johnson ngem naglak-am iti adu a disnog iti daytoy a pannakiboksingna.

Napukaw ti puot ni Johnson idi addan iti pagsukatanna. Naitaray iti ospital ket naipakat ti surgery tapno maikkat ti dara iti utekna. Kalpasan ti lima nga aldaw, gapu ta adda lattan iti babaen ti coma,  inkeddeng ti pamiliana nga ikkatendan dagiti ramit a mangsupsuporta iti biagna.

Agtawen laeng ni Francisco Rodriguez iti 25 idi matay. Pinaturog ni Teon Kennedy ni Rodriguez iti maikasangapulo a rikus iti panagboksingda para iti bakante a USBA superbantamweight championship. Nagtalinaed iti coma ket impalubos ti kabsatna ken ti manadierna a maikkat ti life support tapno saanen nga agsagaba pay.

Ub-ubing pay ni Marco Antonio Nazareth a natay. Agtawen laeng iti 23 ni Nazareth idi kinarupakna iti ring ni Julio Caesar Chavez, Jr. ket impatayna ti brain injury a sinagrapna manipud iti ima ti awan pay abakna a Chavez, Jr.

Ngem ti sinagrap ni Benny”Kid” Paret, maysa a Cuban a welterweight, a danog manipud ken ni Emile Griffith ti maibilang a kakaruan iti historia ti boksing. Di nakapapati ngem naglak-am ni Paret iti 29 a nagsasaruno a danog, a 18 kadagitoy ti naidisso iti uneg ti innem a segundo laeng!

Iti daytoy a kaadu dagiti danog a nagdisso iti bagi ken ulona, nagtungpal ni Paret iti ospital ket awan lattan ti puotna iti 10 nga aldaw sakbay a pimmusay.

Sumagmamano laeng dagiti nadakamat iti ngato. Segun iti maysa nga otoridad iti boxing, mapattapatta nga addan nakurang a 2,000 a boksingero ti natay iti ring ken kas resulta iti pannakiboksingda.

Posible nga ad-adu pay ta adda dagiti di pay am-ammo wenno mangrugrugi a boksingero a natay gapu kadagiti danog a sinagrapda iti pannakiboksingda.

Ngem iti baet daytoy ng istatistika, adu latta dagiti nasged ti tarigagayda nga umuli iti ring tapno agukkon iti dayaw ken pirak.

(Adda tuloyna)

Comments are closed.