Footer

SALAYSAY: Panangaramat iti dila (Maikadua a paset)

Iti kusina, nadatngan ni Tang Tasiong ni Nang Iska a nakamisuot pay laeng a mangnatnateng iti salayusay nga utong. Naimuriannan ti saluyot a naikabil iti puraw a malukong. Iti basbassit a malukong ti nakaikabilan dagiti naimurian a sabong ti sabidukong. Adda iti rabaw ti nalabaga a pinggan a plastik ti nakasador pay laeng a tinuno a paltat nga isagpawna. Nakatugaw iti palangka, ngem kas iti nakairuamanna, nagtugaw pati makinkanawan a sakana ken dina payen inikkat ti nalabaga nga inyipit a sinelasna. Nakasiort iti kumepkep nga asul ken nagblusa iti kunig. Ay-ayamen ti pul-oy ti kumulkuldit a pagat-abaga a buokna manipud iti nakanganga a tawa iti kannigid. Nadalimanek ti panagimurina iti rabaw ti immaratiddog a lamisaan a pangananda.

“Apay, Iska baket, ania ti parikutmo, aya? Ania ti ibagbaga ni Henry nga anakmo a nakasikkarudka kano iti nagatel ti panagdildilana?”

“Ni Jobel man nga anak da Mari Maring ken Pari Timot, lakay, imbagana ketdin a kaslaak agruprupa a bakes!”

“Ania? Nasaona dayta?”

“Wen, lakay, ket nasakit man unay ti nakemko.”

“Ania koma ti pagsakitan ti nakemmo ket saan met a pudno, aber?”

“Ita laeng a makangngegak iti kasdiay iti daytoy a kinabaketko nga agtawenen iti singkuwentay otso.”

“Ala, bay-amon, baket, ta kasaritak ni Pari Timot. Nasaripatpatak itay nga agbambanban iti sirok ti salamagi dita amianan.”

Dinanon ngarud ni Tang Tasiong ni Tang Timot. Buy-ongan ti kumparina, agpadada nga agtayag iti lima a kadapan ken tallo a pulgada. Agparisda a kinesset ti darang ti init ti kudilda. Kas ken ni Tang Tasiong, nakasiort ni Tang Timot iti kupas a maong. Nakasando ni Tang Tasiong iti nadulpet a puraw idinto a serioso ni Tang Timot iti panaggislana iti bayog a bambanenna. Iti makannawanna, nakailad ti agngatngatingat a nuangna. Di met matagtagari ti asona a labang a nagkul-ob iti likudan ti lakay.

Impalawag ni Tang Tasiong ti gagarana. Impasigurado met ti kumparina a nasken nga aturenda ti natakuatanda a biddut.

Kinasao ni Tang Timot ni Nang Maring nga asawana.

“Ket impakatna manen a, tay kinabulkangsitna a kunak, lakay. Bimmalbalasangan, di la ket nagparbengen. Ibagadanto pay ketdin nga awan ti sursurona wenno di pulos binagbagaan dagiti dadakkelna. Nakababain payen.”

“Dayta ngarud, Maring, baket. Nakababain pay kada Pari Tasiong ken Mari Iska. Isu a bagbagaam man daydiay a balasangmo. Amangan no isunto pay ti pakaisarsarakanna.”

“Kanayonko met a bagbagaan, nga aluadanna ti panagsasaona ta balasangen. Saan a manakman ti saanna nga ammo a riendaan ti dilana.”

“Kasaritam baket. No nasken a mangadawka iti Nasantuan a Kasuratan, aramidem, bareng no isu ti pakalukatan ti nakullaapan a panunotna.”

Kinasarita ni Nang Maring ni Jobel a balasangna. Igpilna pay ti sangkabasana tunggal sardam a nangisit a Biblia a nakaisapitan ti nalabaga a marker.

“Ayna, Jobel, balasangko, aya, apay met a kasdiay ketdin ti nasaomon iti maysa a nataengan a kas kaniak nga inam? Dika la ket nagparbengen, anakko…”

“Tinto met naibagbagana, nanang, di naghayblad datao dina oras. Ania koma ti bibiangna no naikapuskolko ti mek-apko idi napanak idiay parlor a nagpapukisak?”

“Uray a, anakko, saan a rumbeng a pagsaw-am a maysa a bakes ti nataengan. Saan a maiparbeng dayta. Naalas nga aramid.”

“Gunggonana!”

“Ayna, anakko, aya, sangkabagak kenka nga aluadam dayta dilam ta balasangkan. Maisagmakka kadayta nga ar-aramidem. Saan nga umno nga aramid. Kas nailanad ditoy Nasantuan a Kasuratan, iti Surat ni Santiago, denggem ta basaek…”

Di nagtimek ni Jobel. Nagdumog kabayatan ti panangbasa ti inana ti igpilna itay a libro.

“Ti  Surat ni Santiago iti kapitulo 3, bersikulo 6 agingga 12 maipapan iti panangaramat iti dila. Kunana: ‘Maiyarig ti dila iti apuy. Kasla lubong a napnuan biddut. Adda naituding a lugarna iti bagitayo, ket isaknapna ti kinadakes iti intero a kinataotayo. Bayat ti panagbiagtayo, puorannatayo iti apuy nga aggapu iti impierno met laeng. Kabaelan ti tao ti mangpaamo, ket napaamonan ti amin a kita ti ayup ken tumatayab, agraman dagiti agkarkarayam iti daga ken dagiti nagbiag a parsua iti taaw.  Ngem awan pay tao a nakapaamo iti dila, ta nakadakdakes ken di magawidan; napno iti sabidong a makapatay. Aramatentayo a pagyaman iti Apo ken Amatayo, pagilunodtayo pay iti padatayo a tao a naparsua a kalanglanga ti Dios. Maymaysa a ngiwat ti paggapuan dagiti balikas a pagyaman ken pagilunod. Kakabsatko, saan koma a mapasamak daytoy! Ta saan nga agbunga ti igos iti olibo wenno ubas iti igos. Di met mabalin ti naapgad a danum ti mangted iti nasam-it.”

(Maigibusto)

Comments are closed.