Footer

2 napapatay iti nagsina a pammaltog

MAGSINGAL, Ilocos Sur – Maysa ti natay idinto a nasugatan ti sabali iti nagsina a pammaltog a naisayangkat ditoy nga ili itay nabiit.

Nasarakan a nadigos iti bukodna a dara ken naideklara iti ospital a nakaitarayanna nga awanen ti biagna ni Glen Urmatam y Peralta, 41, naasawaan, residente iti Sitio Rang-ay, Barangay Caraisan.

Nagresponde dagiti polis  kalpasan a nakaawatda iti report nga adda napasamak a pammaltog iti nasao a sitio idi agarup 9:45 ti rabii ti Disiembre 7.

Iti inisial nga inbestigasion dagiti polis, matmaturogen iti guess room ti biktima, kaduana ti anakna a John-John, 11, Grade V pupil, idi mapapati a simrek dagiti di nabigbig a suspek sada pinaltogan ti biktima iti nadumaduma a paset ti bagina.

Nakarekobre dagiti polis iti tallo a kapsula ken maysa a buli a naggapu iti cal. 45 ken tallo a kapsula manipud iti cal 5.56 iti uneg ti guess room.

Nakarekobre pay dagiti inbestigador iti magasin para iti cal. 45 nga addaan iti walo a bala iti akinlaud a paset ti balay a mapapati a nagnaan dagiti suspek iti panaglibasda.

Mapapati a nainbolbar ti biktima iti droga ket daytoy ti kitkitaen dagiti polis a posible a nakaigapu iti pammapatay.

Immun-una ngem daytoy, napaltogan ti maysa a retirado nga empleado iti uneg ti paraanganda idi rabii ti Disiembre 4 iti Barangay Panay Norte, ditoy met laeng nga ili.

Agpada a naitaray da Mariano Uclaray y Rumias, 65, naasawaan, retirado nga empleado ti Bureau of Immigration ken  Michael John Siruno y Rugante, 27, estudiante iti kolehio ken residente iti Barangay Quezon, Cabugao, Ilocos Sur iti Tolentino Hospital sada naiyalis iti Metro Vigan Cooperative Hospital tapno mataming dagiti sugatda.

Iti panagimbestiga dagiti polis, naammuan a sakbay ti pammaltog, nagbuya da Mariano ken ti asawana iti panagsala ti apoda a babai iti panagdebut daytoy a naangay iti paraangan ti biktima.

Sumrek koman dagiti agassawa iti uneg ti balayda idi nagkanalbuong ket nakita laengen ti babai a nasugatan ti kannigid a lapayag ti asawana ken kannawan nga akinngato nga lipaylipay ni Michael.

Iti follow-up investigation nga insayangkat dagiti polis, nakarekobreda kadagiti uppat a kapsula a naggapu iti cal 5.56 mm iti kapagayan iti asideg ti nakapasamakan ti pammaltog.

Mapapati a dati a susik ti motibo ti pammapatay.#