Footer

EDITORIAL: Nalamiis a langenlangen

Itay nabiit, iti butos a 10-5, inkeddeng ti Korte Suprema a saan a konstitusional ti executive order ni Pres. Benigno Aquino III a nangbuangay iti Truth Commission agsipud ta sinalungasingna ti equal protection clause iti Konstitusion gapu ta maipamaysa ti panagimbestiga ti komision iti mapapati a panagkunniber ken korapsion iti Arroyo administration.

Iti daytoy a desision ad-adda laeng a marubroban ti nalamiis a langenlangen iti nagbaetan ti agdama nga administrasion ken ti Korte Suprema a nagramut idi imbatad ni Pres. Noynoy Aquino a saan nga agsapata iti sanguanan ti chief justice ti Korte Suprema nga impuesto ni dati a Pres. Arroyo sakbay nga immulog iti puestona.

Sakbayna, pinekpeken ni Arroyo ti Korte Suprema kadagiti bukodna a pili a justices a kuna dagiti kritiko a maysa nga investment para iti masakbayan a posible a maisaklang iti Nangato a Pangukoman gapu kadagiti mapapati a panagkunniber ken korapsion bayat ti panangidaulona iti pagilian kas iti ZTE broadband deal, North Railway project, ti fertilizer scam, ken ti mapapati a panagsuitik idi eleksion.

Iti daytoy a pangngeddeng ti Korte Suprema, ad-addan a pumigsa ti suspetsa nga agapiten ni dati a Presidente ken Congresswoman Arroyo iti daytoy nga inaramidna nangruna ket nagsasaganad ti desision ti Korte Suprema a nangpirpirsay kadagiti immuna a pammilin ni Presidente Noynoy.

Masaludsod: ania koma ti paggidiatan daytoy Truth Commission ni Presidente Noynoy kadagiti komision a binuangay ni dati a Pres. Arroyo, kas iti Melo Commission a nagpalutpot mainaig kadagiti nagsasaruno a pannakapapatay dagiti aktibista idi 2006, ti Zenarosa Commission a nagimbestiga mainaig kadagiti private armed groups, wenno ti Mayuga Commission a nangpalutpot iti pannakainbolbar dagiti military generals iti mapapati a panagsuitik idi 2004 presidential elections a nangabakan ni Arroyo?

Mainayon iti daytoy, addan madi a pangrugian (precedent) a manglapped kadagiti kabarbaro a mabutosan a gobierno a mangbuangay kadagiti truth bodies a mangimbestiga kadagiti anomalia ken panagkunniber ti napalabas nga administrasion wenno panangbangen iti panggep ti agdama nga administrasion a mangpalutpot kadagiti mapapati a panagkunniber ken korapsion iti babaen ti Arroyo administration.

Kuna dagiti kaaliado ni Pres. Noynoy Aquino a mangipilada iti rekonsiderasion iti Korte Suprema mainaig iti daytoy a desisionna ngem kas makita iti panagbubutosda, milagron no balinsueken pay ti SC ti desisionna.

Ngem saan koma a daytoy ti pakaupayan ti agdama nga administrasion. Ibilangna ketdi koma daytoy a temporario a setback ket ilungalong ketdi koma ni Pres. Noynoy ti panangipasa ti Kongreso iti maysa a linteg a mangbuangay iti Truth Commission ken ti madagdagus a panangasikaso ti Departament of Justice kadagiti kaso a naidatag maikontra kadagiti napalabas nga agtuturay a pakairamanan ni dati a Pres. Arroyo ket no adda umdas a pammaneknek, maipilaanda iti kaso iti korte.#

Comments are closed.