Footer

NUTRITION CORNER: Umiso a nutrision ti kasapulan ti agpasuso

Kasapulan ti umno a nutrision para kadagiti kaan-anakna ken agpaspasuso saan laeng tapno maisubli dagiti naawan iti bagi ti ina gapu iti panagsikog ken panaganakna no di pay tapno maanduranna ti panagpasuso ken panangaywanna iti maladaga.  Kangrunaan unay ti panagpasuso ta ti taraon ti ina ket isu met laeng ti susuen ti maladaga. No nasalun-at ti ina, nasalun-at met ti maladaga. Segun kadagiti eksperto ti salun-at, kasapulan a nayonan ti ina ti enerhiana, bitamina, minerals ken danum.

Saan a baybay-an ti bagi kadagiti umuna a bulbulan ti maladaga. Nasalun-at a taraon, adu a  pannaturog ti masapul tapno makabael ti bagi iti panagaywan ken panagpasuso.

Ania ngarud ti masapul a kanen ti ina nga agpaspasuso?

Kuna ti Women Fitness website, tapno nawadwad ken nasalun-at ti gatas para ti maladaga, masapul ti ina ti ekstra a 500 calories ti kada aldaw. Malaksid no sobra ti kinadagsenna. Ket no agpasuso iti singin, masapulna ti 600-1000 calories kada aldaw a mainayon iti taraonna.  Masapul nga ad-adu ti inumenna malaksid  ti alkohol ken adda caffeinna.  Mangipauneg iti ekstra a calcium, agbalin a 1,250 mg ti inaldaw a maala iti dua a pints ti skimmed milk wenno uppat a 200 g a yoghurts.

Siguraduen nga addaan ti taraon iti iron, zinc, magnesium, bitamina D, E ken folic acid. Saan a mangan iti mamitlo laeng no maminlima wenno innem a beses ti kada aldaw. Saan a mangipauneg iti tabako, alchohol ken caffeine. Masapul nga aggapu ti nutrision iti taraon. Ngem no agkurang dagiti kasapulan a bitamina wenno minerals mangipauneg kadagiti dietary supplements. Ti de kalidad ken balansiado a dieta ti masapul ti agpaspasuso ken kaan-anak nga ina.#