Footer

2 motorsiklo, nagdinnungpar, motorista napilidan ti bus

SINAIT, Ilocos Sur – Tallo a lugan ti nainbolbar iti aksidente iti kalsada nasional iti Barangay Tapao ditoy nga ili idi Disiembre 16 a nakatayan ti maysa a motorista ken nakasugatan ti sabali.

Naireport a natay ni Gilbert Dancel y Villa, 49, naasawaan, kagawad ti barangay, residente iti Barangay Turod, Badoc, Ilocos Norte, idinto a nadundunor ni Julius Nagum y Yabes, 16, residente iti Barangay Jordan, ditoy nga ili.

Naammuan iti inisial nga inbestigasion nga agpaamianan ti XRM motorcycle a minaneho ni Dancel idi mapapati a rimmuar iti barangay road iti daya ti Yamaha a motorsiklo ni Nagum a bumallasiw iti national highway nga agpaabagatan ket nagdinnungpar dagiti dua a lugan.

Gapu iti pigsa ti panagdinnungpar dagiti lugan, naipuruak ni Dancel iti akinlaud a paset ti kalsada ket daytoy ti pinilidan ti sumungad a minibus a puon iti nakatayanna a dagus.

Nagsagrap met ni Nagum kadagiti sugat iti nadumaduma a paset ti bagina ket naitaray iti Corpuz Clinic and Hospital.

Boluntario a simmuko ni Reynaldo Galindo y Gorospe, 32, driver ti minibus, ken residente iti Barangay Vacunero, Sto. Domingo, Ilocos Sur.

Nakaro ti pannakadadael dagiti dua a motorsiklo idinto a nadadael ti makinkannigid a sango a bumper ti minibus.#