Footer

SALAYSAY: Panangidumduma, negatibo nga aramid (Maudi a paset)

Nagdinamag iti pagadalan ti umadani a panagkasangay ni Beth.  Ngem sumagmamano a kaklaseanna ti nangrikna gapu ta saanda a naawis iti party.

“Naida, inawisnaka kadi ni Beth iti bertdey partina inton Domingo?” sinaludsod ni Claire iti klasmeytna.

“Ne, saan, apay kadi?” nasdaaw ni Naida.

“Ania, dinaka inawis? Apay ngata ket kaklaseanta met? Kaarrubayo pay, tallo laeng a balay ti nagbaetan dagiti balayyo. Ania ngata ti makagapu?”

“Saanak siguro a maikari, Claire. Ngamin anaknak laeng ti nanumo a mannalon. Ngem saan a bale, awan met ti mapukaw kaniak. Maysa laeng a pannangan dayta, saan kadi? Manganakto laengen iti ittip ken kilabban iti balaymi, hi-hi!”

Natakuatan dagiti agassawa a Nita ken Melo ti saan a patas a pannakilangen ti anakda kadagiti am-ammo wenno gagayyemna. Nasken nga inda aturen dayta saan a maiparbeng a panirigan ti anakda iti biag tapno awan ti pakababalawanna iti pannakilangenna kadagiti kaadalanna. Nasken nga isuroda ti anakda iti umno nga adal iti biag tapno agbalin a mapangnamnamaan,   responsable ken ammona ti makirelasion iti padana a tao.

Kinasao ni Melo ti anakda. “Inawismo met la kadi ni Naida nga anak da Erning ken Aida?”

“Hmp, diak nga inawis, Tatang…”

“Apay a dimo inawis? Klasmetmo. Kaarrubatayo pay.”

“Diak unay a kagayyeman.”

“Dimo unay kagayyeman? Ngem apay met?”

“Basta diak inawis. Dagiti laeng adda mabalinna ti inawisko ken dagiti honor student tapno class met ti partik, hi-hi-hi!”

“Naa, madi daytoy a panirigam iti biag nga ubing…”

“Apay a kasta met ti mulagatyo kaniak, Tatang?”

“Kayatmo a sawen, agpilika iti gayyemmo?”

“Natural a tatang. Apay madi kadi ti agpili iti gayyem?”

Kinasarita ni Melo ti asawana maipapan itoy a banag. Nasken nga aturenda ti panirigan ti anakda. Tapno lalo a napasnek ti pammagbaga ti ina, nasken a mangadaw daytoy kadagiti binatog iti Nasantuan a Biblia. Ta ti linaon ti Nasantuan a Kasuratan ket Sao a mismo ti Dios.

Maysa a malem nga awan ti ar-aramiden ti anakna, inasitgan ni Nita. Adda iggemna a Bibilia.

“Beth, anak, denggem a nalaing ken anagem daytoy nga ibasak. Manipud iti Surat ni San Pablo kadagiti Taga-Roma 12:16, paset ti 17 ken 18.

Dikay mangidumduma. Dikay agpalangguad; makigayyemkayo ketdi kadagiti nanumo a tattao. Diyo ipagarup a mamasiribkayo. (v16)

…Ikagumaanyo nga aramiden ti naimbag iti imatang ti amin a tao. (paset ti v17)

Aramidenyo amin a kabaelanyo a makilangen a sikakappia kadagiti amin a tao.”(v18)

“Anak, saan a nasayaat ti mangidumduma aglalo kadagiti gagayyem ken kaarruba,” kinuna ni Nita.

“Saanak met a mangidumduma, nanang…” insungbat ni Beth.

“No saan, apay ngarud a dika inimbitaran ni Naida? Klasmet ken kaarrubam a mismo. Apay? Agsipud kadi ta anak ti napanglaw? Wenno, saan a nalaing iti klase, kasta kadi?”

Saan a nagtimek ni Beth.

“Dikay agpalangguad, kuna pay daytoy Nasantuan a Biblia…”

“Saanak met a napalangguad, nanang…”

“Iti panangawismo iti amin nga honor students a padam ken saanmo a panangawis  kadagiti dadduma nga am-ammom ken gagayyem, lalona unay ti kaarrubam, maysa daytan a  kinapalangguad. Ta agkuykuyog a kanayon  ti panangidumduma ken kinapalangguad. Diyo ipagarup a mamasiribkayo, kuna pay ti Nasantuan a Kasuratan. Ammom kadi ti kayat a sawen daytoy?”

“A-ania, nanang….”

“Saanka pay laeng a masirib, anak, uray addaka iti honor roll. Ta ti tao a masirib, gayyemna amin a tao. Nasayaat dagiti aramidna. Nasin-aw ti panagsasaona. Mulinaw ti panunotna. Agbibiag iti kinalinteg. Adda kenkuana ti Lawag.”

“Ania ngarud ti nasayaat nga aramidek, Nanang?”

Imbaga ni Nita ti aramiden ti anakna.

Rinanta a sinarak ni Beth ni Naida iti kalapawda, ket kinasaona.

“Umaykanto no Domingo idiay balay, Naida, gayyemko. Adda partitayo. Kasangayko…”

“Diak a maikari, Beth. Ngamin, nakurapaykami laeng. Nakapuyak pay iti eskuelaan…”

“Awan ti nakuneng, awan ti masirib. Awan ti nabaknang, awan ti napanglaw. Awan ti panangidumduma iti panaggagayyem. Annaknatayo amin ti Dios. Isu a dumar-ayka koma iti kasangayko. Adutayo. Sibubukel a klase, dagiti titsertayo ken dadduma pay…”

“Agyamanak unay, Beth, agyamanak…” nakaragragsak ni Naida a nangabrasa ken ni Beth.

Ti nagtungpalan da Naida ken Beth? Nagbalinda a responsable nga aggayyem, kas anak, ken kas umili a managdayaw ken agraem iti Dios.#