Footer

SARITA: MAYSA NGA ALDAW ITI BIAG TI MANGISURSURO (Tuloyna)

UY, addaka gayamen iti Maslong, ti laengen Pas-adan ti daliasatem ket makasangpetkanton.  Dua a bantay laengen ti sang-atem ket makadanonkanton.

Diakto pay la ngamin nagrubbuat idi kalman.  Parparbangonek ketdin ti magmagna ditoy. Makasalawakto la ngata iti beklat.

Isu met koma ti kunak, ngem no ania ket ngamin ti napanunotmo ta impadpad-engmo pay laeng ti nagrubbuat. Ania ngarud ita, uray nalamiis ti parbangon ket agling-etkan.

Ayna, no maangotnakanto ni Ma’am Krisanta, agmisuotto man la ngatan. Kiddelennakanto manen.

Numona ta dandanin  magaw-atmon ti pagrukodanna.  Bareng, ag-wen met laengen.

Ha-ha, mayat sa ketdi nga isadagmo dayta likudmo iti nagrungarong a ramut ti akasia bayat nga inka lagipen ti nakiro a napalabas.  Wen, kabaelam pay met ti magna, ngem maymayat no irelaksmo bassit dagita piskel. Danggayamto metten a sukogen ti rupa ni Ma’am Krisanta iti parparmatam.

No tinapayka koma, ni Ma’am Krisanta ti kape a napaksit a bagas a mangpalukneng kenka.

Ngem no apay ketdi a malagipmo latta ti nakas-ang a nagbanagan ti panagayatmo iti balasang a taga-ditoy.  Nee, ta pabasolem sa manen ni Imelda no apay a medio nauyongka kadagiti nagannak ken ubbing a mangipatpatulod ti annakda iti pangisursuruam.

Wen, ta kastaka idi, nauyong.  Adda gayam im-impenem a panagibales iti panangtallikud kenka ni Imelda.  Isu gayam a dika nagkedked idi maipuruakka iti Battawang tapno ditoyka a mangisuro.

Kas idi nangmitingka iti PTCA.

Ti kayatko, agbalin a masirib dagiti annakyo tapno saanda nga agbalin nga ignorante iti lubong a paggargarawanda.  Tapno agbalinda a masirib, masapul ngarud a suportaranyo dagitoy nga ubbingyo.  Maisuromi isuda, ngem ad-adda a dakayo ti badangda.  No imbaonyo laeng dagiti ubbingyo tapno sumrek iti pagadalan ket makaammokamin a mangisuro ken mangaywan, nasaysayaat laengen a diyon ipastrek ida ket agmulada laengen iti kamote a padayo.

Kasla makitkitam pay laeng ita ti panagkuretret ti muging ni Krisanta, kas ti panagkuretret dagiti nagannak a nagatendar.

Ania ti kayatmo kadi nga ibaga, Apo mistro?

Umuna, awan ti Apo mistro, minamaag dayta nga awag.  Sir, kunayo ta teachernak ngarud, ken head teacherak ditoy.  Sir, kunayo ngarud kaniak, ken Ma’am, kunayo met ken ni Krisanta.  Babaen daytoy, masursuruankayo nga agdayaw. Ti panagdayaw ket panagrespeto, ket no irespetodak, irespetodak met dagiti ubbingyo. Tatta… kayatko nga igatanganyo iti baro a lapis, ballpen, notebook, krayola, ken uray libro dagiti ubbingyo.  Maganasda ngarud ti agadal no dagiti met nagsobsobraan idi napalabas a tawen ti usarenda?  Ken no igatanganyo man ida,  maymaysa met wenno dudua.

Ket no awan met pangalaanmi Mis… S-sir! Panagtalon laeng ti pagbiagmi ken nagadayo ti ili ditoy ayantayo.

Da’ta ket ta negatibo nga insigida ti mapanunotyo.  Sinasadut.  Agmulakayo iti adu a kamote, saba wenno agaramid iti adu a buyboy, sumalogkayo idiay Tagudin ket ilakoyo idiay. No adu ti maaramidyo, adu ti malakuanyo ket makagatangkayo iti kasapulanyo.  Ania ketdin, kasta la kasimple. Ken nee, daytoy pagadalantayo, tedda met laengen ti lati, diyo la kayat ngatan a mapinturaan met. Dakayonto pay, no dikayo agsukat iti tallo nga aldaw, ket aggagatelkayonto pay.  Kasta met ti pagadalan.  Ag-projecttayo iti pintura, ag-kontribusiontayo.

Imbag la ketdin ta nasingpet dagiti nagannak iti dayta a gundaway ta didaka ket koma binansag iti binubodan.  Ngem nee, awan met sa ti natungpal a mandarmo ta uray ngata pespesem ida, awan ti pangalaanda.

Ayna, ti basol ni Imelda, basol ti amin a kalugaranna.  Piman dagiti ubbing a naglak-am iti pammalesmo.  Adda   dagiti nagsardeng.  Ta kasano ngamin a dida agamak kenka, ket naungetka unay uray kadagiti ubbing.

Nee, dakayo nga adda iti grade 1, bayat nga agsursuratkayo iti ABAKADA, agtaltalnakayo. No apay met nga awan pay pagadalan nga itedda ditoy.  Aglubbon ketdin ti grade 1 ken 2.  Uy, dakayo a grade 2, iruaryo dagiti papelyo ta ag-quiztayo iti math.

Dagiti ubbing, dakkel  ti butengda kenka, ta tunggal maysa ket dagusda a nagala iti papelda.  Malaksid ken ni Arnel. Kinidagna ti kaabayna.

‘Kannak man iti papel, Antonio.  Awan ginatang da Inang ngamin.

Ay, diak man kayat, ungtannak ni sir no agpadawatak.

Alan, a!

Diak kayat, kunak la ngaruden ket!

Ania dayta a riri, Arnel?

Dumawdawat iti papel sir.

Ania? Dimmawatka manen idi kalman, dumawdawatka man itan.  Maymaysa pay ta notebookmon.  Pagisuratam met aminen a subjectsmon.  Anian a kinasadut ni Inangmo.

Awan ngamin ti kuarta da Inangko, sir.

Awan kuarta! Awan kuarta! Ania’t pangipagpagarupan da Inangmo iti pagadalan, libre amin.  Hala, rummuarka, dika agsubsubli ditoy no awan ti papel ken kompleto a notebookmo.  Rummuar!

Nagsangit ti piman nga ubing, dina kayat koma, ngem nabilbilegka.  Nagtaray a rimmuar ket dandanina pay nadungpar ni Miss Krisanta a lumabas met iti dayta a gundaway.

Kasta ti rumbeng kadakayo nga ignorante.  No makaramankayo ngamin  iti angin iti baba, ipagarupyon a nalaingkayo.  Awan nagdudumaanyo ken ni Imelda a nakalugan la iti XRM, ti ammona, nakaluganen iti pagsayaatan!

(Adda tuloyna)

Comments are closed.