Footer

BANNER NEWS: Barangay kagawad, nakasuan iti double murder

STO. DOMINGO, Ilocos Sur – Napilaan iti kaso a double murder ti maysa a barangay kagawad mainaig iti pannakapaltog ti dua a kalugaranna iti barangay Naglaoaan ditoy nga ili idi rabii ti Disiembre 23.

Napilaan iti kaso a double murder iti provincial prosecutor’s office ni Adriano Tacla y Tacla, 50, naasawaan, barangay kagawad, residente iti Barangay Naglaoaan ditoy nga ili gapu iti pannakapapatay da Michael Briones y Villegas, 25, baro, mangisursuro, ken Herwin Antonio y Tablatin, 27, naasawaan,  agpada a kalugaran ti suspek, iti Puerto Beach road a sakup ti nadakamat a barangay idi agarup 9:30 ti Disiembre 23.

Segun iti inbestigasion, bayat ti kaadda ti suspek ken ni Barangay Captain Edmund Taruna iti outpost a naipasdek iti nasao a barangay road,  immasideg dagiti biktima ket dinamagda no apay a nagtagiarmas ni Tacla ken no ania ti basolda.

Mapapati a nagpudot ti suspek ket pinaltoganna dagiti biktima iti sumagmamano a daras a nakasugsugatan ti nadumaduma a paset ti bagi dagitoy.

Naitaray dagiti biktima iti Metro Vigan Cooperative Hospital, Bantay ngem pimmusay ni Antonio bayat ti pannakatamingna. Pimmusay met kalpasanna ni Briones.

Inaresto dagiti nagresponde a polis ni Tacla iti balayna ket naipan iti police station.

Nairaman met a naaresto ni Dexter Briones y Villegas, 20, baro, residente met laeng iti nadakamat a barangay, kalpasan a nakumpiska kenkuana ti maysa a cal. 45 nga addaan iti maysa a magazine assembly a naglaon iti 6 a bala para iti cal. 45.

Mapapati nga imet ni Briones ti nasao a cal. 45 idi immasideg kadagiti polis bayat ti panagimbestigada iti nakapasamakan ti krimen.

Kabayatanna, insuko ni Taruna ti maysa a cal .45 a nagmarka iti Armscor nga addaan iti maysa a magazine assembly a naglaon iti pito a bala para iti nadakamat a kalibre a mapapati a naaramat  ken insuko ti suspek.

Nakarekobre pay dagiti inbestigador iti maysa a magazine assembly, 13 a kapsula, 2 a live a bala ken maysa a buli para iti cal. 45.

Taktakuaten pay dagiti inbestigador no ania ti motibo ti pammaltog.#

Comments are closed.