Footer

Barangay kagawad, tanod, nabagsol bayat ti Christmas party

SAN JUAN, Ilocos Sur – Nagtungpal a nadara ti naragsak koma a panangselebrar iti Paskua kalpasan a nabagbagsol ti maysa a barangay kagawad ken tanod iti Sitio Kavillahermosaan, Barangay Barbar ditoy nga ili idi bisperas ti Disiembre 24.

Nagsagrap kadagiti sugat iti nadumaduma a paset ti bagida da Alexander Villahermosa y Tollo, 47, naasawaan, barangay kagawad, ken Romeo Aguilar y Venenciano, 38, naasawaan, barangay tanod, agpada a residente iti Barangay Barbar ditoy nga ili bayat ti Christmas party a naangay iti lugarda idi rabii ti Disiembre 24.

Nabigbig ti suspek a ni Conrado Dumalen y Basa, kalugaranda met laeng.

Saan pay nga ammo ti motibo ti pammagsol.

Iti report manipud iti polis ditoy, madama ti panagraragsak dagiti biktima ken dagiti dadduma a miembro ti BAPA ditoy idi simmangpet ni Dumalen a mapapati a nabartek.

Mapapati nga iti awan a rason, binagsol lattan ti suspek da Villahermosa ken ni Aguilar ket inuksot met ni Aguilar ti paltogna sana pinaputukan ti suspek.

Mapapati a nasugatan ti suspek agsipud ta adda tedted ti dara iti daga idi naglibas.

Narekobre iti nakapasamakan ti krimen ti dua a deformed slugs ti saan pay nga ammo ti kalibrena a paltog, 6 a kapsula ti Cal. 45, maysa a natirad a bolo nga agatiddog iti sumurok-kumurang a 17 a pulgada agraman ti pagiggaman, maysa a puraw a polo shirt a nadaraan, nangisit a plastik nga improvised a kaluban ti bolo, ken sangaparis a sinelas.

Saan a narekobre ti paltog nga inaramat ti barangay tanod.

Naitaray nga immuna dagiti biktima iti Suero Clinic Hospital sada naiyalis iti Gabriela Silang General Hospital.

Madama ti panagpalutpot dagiti polis mainaig iti nasao a pammagsol.#

Comments are closed.