Footer

EDITORIAL: Conditional cash transfer: solusion ti kinakurapay wenno doleout?

Adda pagsasao a no pinadawatam ti kaarrubam iti bunga, inikkam laeng iti taraonna para iti dayta nga aldaw; ngem no pinadawatam iti paramut wenno patubo, taraonna iti agnanayon.

Maiyaplay dayta a pagsasao iti programa ni DSWD Secretary Dinky Soliman a conditional cash transfer (CCT) kadagiti poorest among the poor wenno kapapanglawan kadagiti napanglaw a Filipino. Mapattapatta nga agdagup dagiti family benepiciaries iti 4.6 milion a pakailatangan ti pondo a P21.19 bilion.  Iti laengen pannakaiwaras ti P17 bilion kadagiti benepisario ket agdagupen iti P4 bilion ti gastosen agsipud ta  mangiyemplo ti DSWD iti kabarbaro a 4,000 nga empleado a kanayonan ti 2,000 a siguden nga empleado.

Iyimplementar ti 4 Ps (Pantawid Pamilyang Pilipino Program) ken ti  KALAHI-CIDSS ti nasao a programa.

Ngem saankami a komporme kadaytoy nga addang ni DSWD Secretary Dinky Soliman. Saan a long term solution daytoy a mangikkat wenno mangkissay iti bilang dagiti nakurapay. Masirmatami ketdi a silulukat a ridaw ti kurapsion daytoy a programa.

Dakkel unay dayta a budget nga iwaras-ipadawat ti gobierno idinto ta agkurkurang dagiti kangrunaan a kasapulan a serbisio dagiti umili, kas iti edukasion, salun-at wenno dagiti basic services.

Maysa pay a mangted iti panagduadua ti saan a nalawag a pakaiwarasan ti gatad, no asino dagiti kakurapayan kadagiti amin a nakurapay. Saan met ngarud nga ilatak ni Secretary Soliman ti kinaasino dagitoy.

Dagiti kakurapayan kadagiti amin a nakurapay ket saanda laeng nga agnaed kadagiti urban area, lalona iti Metro Manila no di pay uray kadagiti probinsia aglalo kadagiti sulsulinek a lugar a narigat pay a danonen ti aniaman a pampasahero a lugan. Ditoy ti ammomi a yan dagiti pudpudno a kakurapayan kadagiti nakurapay.

Ken ni Senador Juan Ponce Enrile, masarakan dagiti poorest among the poor kadagiti nasulinek a kabarongbarongan iti igid ti baybay.

Dakkel ti tendensiana nga agtinnag laeng iti korapsion ti programa gapu ta saan a nalawag no asino dagiti kakurapayan kadagiti amin a nakurapay a pakabusbosan manen ti kuarta ti gobierno a naggapu kadagiti taxpayers.

Saanmi a pagduaduaan ti kinasayaat ti motibo ti programa ta nasken a matulongan dagiti kakurapayan kadagiti nakurapay. Laeng ta saan a kas iti agmatuon nga init ti kalawag dagiti annuroten ken reglamento ti nasao a proyekto ken kinaasino dagiti benepisario. Kasapulan ti transparency iti implementasion ti kastoy a gannuat.

Saan a duol ti kasapulan dagiti kakurapayan kadagiti amin a nakurapay no di maipaayanda koma iti disente ken mapangnamnamaan a trabaho tapno mabiag manen dagiti arapaapda.  Ta agingga nga adda arapaap ti tao, saan a mapukaw ti posibilidad a makapanaw iti kinakurapay.

Tulongantayo  dagiti kakurapayan kadagiti amin a nakurapay, wen, rumbeng la unay dayta. Ngem maitutop kadi a limosan ida iti binulan imbes nga ikkan ida iti disente ken mapangnamnamaan a trabaho?#

Comments are closed.