Footer

Imon ti ramut ti pammagkong

STA. LUCIA, Ilocos Sur – Imon ti nakagapu iti pannakabagkong ti maysa a lalaki sumagmamano nga oras kalpasan ti isasangbay ti Paskua babaen pay met iti ima ti dakkelna a lalaki.

Saanen a naidanon iti ospital ti biag ni Jimmy Aguinoas y Fabro, 40, naasawaan, kalpasan a binagsol ti amana a ni Villamor Aguinaoas y Tuyan, 69, naasawaan, karpintero, agpada a residente iti Barangay Nangalisan, ditoy nga ili idi agarup 2:30 ti parbangon, nasurok laeng a dua nga oras kalpasan ti isasangbay ti Disiembre 25.

Sakbay ti pammagsol, aggiinom ken agkakanta ti biktima ken gagayyemna iti videoke bar iti nasao a barangay idi immasideg ti suspek ket kiniddawna kadakuada nga iddependa ti videoke agsipud ta makadisturboda iti barangay.

Nagtungpal ketdi daytoy iti panagsubangda nga agama.

Idi aggawiden ti biktima ken ti asawana, mapapati a kinabil ti biktima ti baketna sana inakusaran nga adda relasionda iti amana.

Pinadas manen ti suspek a pinagtalna dagiti dua ket nagsubangda manen nga agama a nagtungpal iti panangbagsol ti ama iti anak.

Saanen nga immabut iti ospital ti biag ti biktima.

Addan ti suspek ken ti imuko iti kustodia ti polis ditoy nga ili.#

Comments are closed.