Footer

Motorista, tinarayan nakasapgid iti luganna

TAGUDIN, Ilocos Sur – Di pay ammo ti kinaasino ti nagmaneho iti van a  nangsapgid iti maysa a motorsiklo a nakasugatan ti nagmaneho iti aksidente a napasamak iti national highway ti Barangay Becquez ditoy nga ili idi agsapa ti Disiembre 28.

Naiyospital iti Tagudin General Hospital ni Amor Dasalla y Ramuanja, 59, balo, nagmaneho iti Honda XRM motorcycle gapu iti sugatna iti ulona kalpasan a sinapgid ti maysa a Mitsubishi Adventure van, maris berde ti luganna idi alas 7:00 ti agsapa ti nadakamat nga aldaw iti nasao a barangay.

Iti inisial nga inbestigasion, naggapu ti motorsiklo manipud iti amianan ket agpaabagatan koma ngem mapapati a di nakita ti biktima ti sumungad nga agpaabagatan met a van a puon ti nakasapgidan ti van iti kutit ti motorsiklo ken nakaikrasan ti lugan iti kalsada.

Saan a sinardengan ti drayber ti van ti biktima no di ket timmakias iti nakapasamakan ti aksidente.

Nangisayangkat ti polis ditoy iti checkpoint ken pinakaammuanda dagiti kaarruba a police stations iti La Union ngem nakalusot ti di pay nabigbig a drayber ti van.

Sakbayna, maysa nga aksidente ti napasamak iti national highway a nakainbolbaran ti maysa a van ken motorsiklo a nakatayan ti motorista idi malem ti Disiembre 25.

Naireport a naitaray ni Ricky Galleso y Alcantara, residente iti Barangay Allangigan Segundo, Candon City, iti Sta. Lucia District Hospital ngem saanen a naidanon a sibibiag pay.

Nabigbig met ti drayber ti Kia Vesta van a ni Artemio Claridad y Lopez, 45, naasawaan, residente iti Barangay Tampugo, Tagudin, Ilocos Sur.

Naammuan iti report a mapapati nga inobertekan ti Honda Wave a motorsiklo a minaneho ni Galleso ti van a minaneho ni Claridad iti national highway a sakup ti Barangay Saoat, Sta. Cruz, Ilocos Sur ngem nasapgidna ti makannigid a paset ti van a nagresulta iti saan a pannakakontrol ti biktima iti manibela ken nakadungparanna iti kongkreto a barrier iti igid ti kalsada.

Nakaro dagiti dunor a sinagrap ni Galleso a puon ti nakatayanna. Pirmi a nadadael ti motorsiklona.

Boluntario a simmuko ni Claridad iti polis ti Sta. Lucia.#

Comments are closed.