Footer

SARITA: MAYSA NGA ALDAW ITI BIAG TI MANGISURSURO (Maudi a paset)

Ngem kabigatanna, nagsubli ni Arnel. Adda iggemnan a half pad a papel, dua a notebook a kabarbaro ken maysa a lapis.

Kunakto met a mairemedioyo no makangngegkayo ket!

“Saanak koman agbasa sir, ngem immay ni Ma’am Krisanta. Kinasaritana da Inang ken ni Tatang, intedna pay daytoy.

Dika nasdaaw iti imbaga ni Arnel ta saan a daydiay ti umuna a gundaway nga inaramid dayta ni Krisanta.

Masmasdaawka ta iti sangkapirgis a sueldona, maisamirana pay laeng ti gumatang kadagiti kasapulan dagitoy nga ubbing. Uray iti uneg ti klasena iti grade 3 ken 4, adu dagiti ginatgatangna a visual aids a pangnaynayonna iti panagisurona.

Ti ket ayatna ta no sumangpet, adda daan a kawes nga isangpetna, adda pay dagiti daan a libro a no sadino la’t nangal-alaanna.

He he, impagarupmo a kayatnaka nga artapan.  Gapuna a kasapulan met a kasaritam.

Addan sa ketdi ambisionmo, Miss Dumacling. Agwarwarasen ti damag ti kinamanagparaburmo.  Ibagam latta tapno siak ti mangiduron kenka, tapno dika matinnag iti derraas.

Maasianak ngamin kadakuada John, ammom metten, awan ti mabalinda a pangalaan ditoy.

Miss Dumacling, uray nag-classmate ta idi high school, irespetonak latta met a headyo ditoy, a.

Kasta aya… SIR!

Ti ar-aramidem ket panangkunsinti… saan a panangtulong. Agbalinda a nakadepende kenka ket saan a napintas a mapasamak dayta.

Nakarkaro a saan a napintas nga agsardengda nga agbasa agsipud ta awan ti kasapulanda, sir.  Nakarkaro nga agbalinda a nengneng no sitayo mismo ti mangiduron kadakuada iti kinakawaw… SIR! Ket awan serbina ti kina-titsertayo no sitayo mismo ti mangiduron kadakuada iti kina-ignorante.

Nabagas dagita a balikasmo, Miss Dumacling. Ngem maawatam koma met, a maymayat nga agtalinaed dagitoy a tattao ditoy, ta iti gundaway a maramananda ti biag ti baba, pagraramanandanto… kasla ken ni Imelda!

Apay nga iramramanmo dagitoy nga umili iti inaramid ni Imelda iti panangtuntonn iti arapaapna?  Isu ti gagemna daydiay, ket iniggamanna ti gundaway a nakitana. Ket sika ngarud, ania ti makunam iti bagim… a nakaramanka laeng iti bassit a turay iti pagadalan ket ipagarupmo a sikan ti ari nga addaan sarukod a balitok.  Mr. Bangaoil, ti panagbalin a mangisursuro ket saan laeng a panangisuro iti uneg ti klase kadagiti ubbing, ti manursuro ti mangmuli kadakuada no ania ti pagbanaganda iti masakbayan ken ti aglawlawda.  Birbirokek ti sigud a ni Juan ngem naiwawan sa. Saan laeng a ni Imelda ti mabalin a mangbukel iti biagmo.  Bagbagaam ta bagim, ta kakaasika nga agbibiag iti napalabas. Excuse me, Mr. Bangaoil.

Idi rimmuar ni Krisanta iti classroommo, dika ammo no ania ti rupam iti daydiay a gundaway.  Adda met gayam uyong kaniana. Ngem ad-adda ti mariknam a pannakapabainmo. Agpayso a maymaysaka a nakangngeg, ngem nakarkaro ti mariknam ta babai nga addaan puso ti nangibalikas.

Ngem, agurayka, tumakderka metten iti panagtugawmo iti nagrungarong a ramut ti akasia.  Asideg la ngaruden ti papanam. Maysa la a pug-awen ket makadanonkanton.

Ala, magnaka, Juan, ta nagasgasatka, ta ditoy a lugar ti nangisuruam.  Nagasgasatka manen ta ni Miss Dumacling ti maysa kadagiti nagbalin a co-teachermo. Di magatadan ti kinamaestrana.

Uyy, addaytan ti payuh.  Addadtoytan.

Ket nee, masabetmo pay ni Ama Angkuan a mapan gayam agkali iti kamote iti inumana a bantay. Lumakayen ti tatang ni Krisanta ngem nakidser latta

“Naimbag a bigatmo, sir…”

“Kasta met, Ama. Ngem wen sa, kasla maymayat a denggen ti naganko lattan ngem tay sir a sumanirsir.  John, kunam lattan, Ama Angkuan. Nasamsam-it iti lapayag man.”

Nagngursiit ket ngarud ti lakay; anian, numona ta nadudog san iti mama ti ngipenna ta nakangisngisit metten.

“Ay wen gayam, sir, adda naalak nga alingo idi kalman, ikkankanto iti etag.”

“Pagisu Ama, adda linaonna toy bagko, ngem dimo ibagbaga ken Ma’am Krisanta, wen? Mayat daytoy, innalak idiay Tagudin idi kalman. Nasanger la ketdi.”

Nalawlawa manen ti ngursiit ni Ama Angkuan.

Ngem agurayka, dandanin mangrugi ti flag raising ceremony. Ayna, naladawka latta met, dayta ngamin, naadduam manen ti nanglagip iti napalabas.

Ay, imbag la ketdin, ni Krisanta gayam.

Gurayka, mayat met ti hairpin iti buokna. Bagbagayna man. Wenno ita laeng ngata a madlawam a napintas ni Krisanta.

Ngem agurayka, addadtoyta metten, usto metten ti panangliwliwam iti bagim. Kinasarsaritanak iti panagmaymaysam tapno dika laeng matuokan iti nawatiwat a dalan. Inka ket tumakder dita sango ta kadduaem ni Krisanta. Ayna, mayat man ti paludipna iti pannakakitana kenka. Ket adda simmiray a bassit nga isem iti bibigna.

Bimmang-ar ket ngarud ti riknam iti daytoy nasalemsem a bigbigat ti Battawang.#

Comments are closed.