Footer

3 lalaki a nangmalo iti kalugaranda, nakasuan

CANDON CITY – Tallo a lalaki ti napilaan iti kaso iti homicide idi Enero 3 kalpasan a natay ti kinabkabilda a biktima idi rabii ti Disiembre 30.

Napilaan iti homicide da Dominador Gazmen y Cabalbag, 19, Kelvin Cabalbag y Fontanilla, 19, ken Louie Cabubura y Cabalbag, 17,  agpapada a residente iti Barangay Pinipin, Sta. Cruz, Ilocos Sur, gapu iti panangkabilda ken ni Teofilo Asuncion y Collado, 42, naasawaan, kalugaranda met laeng a nagtungpal iti pannakatayna.

Sakbay ti insidente, napan nagparti ti biktima iti kalding iti balay ti maysa a kalugaranda sa nagturong iti plasa tapno agbuya iti parambak ti piesta. Ngem iti nasipnget a dalan sakbay ti plasa, minalmalo dagiti suspek babaen ti natangken a banag.

Naitaray ti biktima iti ospital ngem naideklara a natayen gapu kadagiti sugatna iti ulo.#

Comments are closed.