Footer

Awan paltog ni lakay: asawa ti biktima

VIGAN CITY – Impetteng ti asawa ti napapatay a dati a miembro ti agtatakaw nga awan ti paltog daytoy idi inaresto dagiti polis iti agsapa ti Enero 5 iti Barangay Raois ditoy siudad.

“Kasano nga adda paltogna  ket adda iti abayna dagiti polis a nangaresto kenkuana?” kinuna ni Felicitas Lubbui bayat ti interbio kenkuana ni Jun Ramos a naipatangatang iti DWRS idi Enero 6 kas reaksionna iti imbatad ni Police Chief Inspector Villaflor Bannawagan, provincial officer ti CIDG-Ilocos Sur a nakipinnaltog ti asawana a puon ti nakagudasanna.

Kinuna ti baket nga iti pasado alas singko ti bigat ket agid-idda ni lakayna idi kinugtaran dagiti polis a mangaresto ken ni lakayna ti ruangan sada pinasindian ti silaw.

Kinunana a kiniddawna pay kadagiti polis a maikkan iti diaket ti lakayna ken agpantalon pay agsipud ta “masaksakit isuna.”

Kinuna pay ni Felicitas nga iti kinarigat ti panagbiagda, no adda paltog ni lakayna, ilakoda laengen tapno adda gastuenda.

Segun iti asawa ti biktima, masaksakit ti asawana ket inkiddawna kadagiti nangaresto kenkuana a “saanda koma a gargarawen ta agag-agas”  ngem napaltogan latta daytoy.

Mapapati a napasamak ti pammaltog iti agarup sangapulo a metro iti laud ti balay ti biktima.

Nupay kasta, kinuna ni Felicitas a dina nakita ti pannakapaltog ti asawana ta nagbati iti balayda idi rimmuar dagiti polis ken ti lakayna.

Segun ken ni Felicitas, di mabayag kalpasan ti iruruar dagiti polis ken ti asawana,  nakangegda laengen iti putok ken mapapati a boses ti maysa a polis a nagkuna a “lumabanka ketdin.”

Idi madamag no ania ti sumaruno nga aramidenna, kinuna ti baket a nakiro pay ti panunotna gapu iti napasamak.#

Comments are closed.