Footer

Pannakapreserba ti kadaanan a kultura, naigunamgunam iti Buyag 2011

LIDLIDDA, Ilocos Sur – Masapul a maprotehiran, mapreserba ken maiyam-ammo dagiti kadaanan a kultura kadagiti ubbing a henerasion tapno masiguro ti panagtuloy dagitoy uray pay awanton dagiti nataengan a mangisaysayangkat kadagitoy, daytoy ti inyunay-unay ti nasional a presidente ti liga dagiti bokal bayat ti Buyag 2011 a narambakan ditoy nga ili idi Enero 6.

“Bassit nga ili ti Lidlidda ngem adda kadakayo nga umili a mangimaldit iti kaimudinganyo iti mapa ti probinsia nga Ilocos Sur ken iti sibubukel a pagilian, kinuna ni Sangguniang Bayan Member Henry Bacunay, national president ti Board Members League iti sibubukel a pagilian.

Innayon ni Bacurnay a nupay  madadaan a tumulong dagiti  opisial ti probinsia,  masapul a mangrugi ti bukod a panagkaykaysa dagiti umili ditoy.

Naipangruna ti kultura dagiti tribu iti dumaya iti pannakaisayangkat ti Buyag 2011 kas pangselebrar iti panagpiesta daytoy nga ili idi Enero 6.

Nakipartisipar iti daytoy a parambak dagiti sangapulo ket maysa a barangay ditoy nga ili a nangipakitaanda kadagiti kadaanan a ritual, sala, samiweng ken kaugalian dagiti nagkauna a kameng ti tribu a nagtaudan ti pulida.

Ni Bacurnay, maysa a bokal a mangibagi iti maikadua a distrito ti La Union ti nangirugi ti pannakairaman ti aldaw ken rabii dagiti indigenous people (IPs) iti kabangibang a probinsia tapno masalakniban ti kultura dagiti tribu iti nadakamat a probinsia.

Dinawat pay ni Bacurnay ti nair-irut pay a pannakilangen dagiti tribu ti Ilocos Sur kadagiti tribu ti La Union tapno aginnadawda iti adal para iti ad-adda nga epektibo ken agresibo a pannakatagiben ti kultura kadagiti agkaarruba a probinsia.#

Comments are closed.