Footer

SALAYSAY: Agabrodka, kailian? Agannad kadagiti paw-it!

Libre ti agarapaap. Awan makaiparit.

Adu dagiti agarapaap nga umasenso ti panagbiagda ken ti bukodda a pamilia, mapagadal iti kolehio dagiti annak, wenno kakabsatda tapno maaddaanda met iti napintas a trabaho ken nasaliwanwan a panagbiag iti masakbayan. Iti ababa a pannao, arapaapenda a maitarayanda ti kinakurapay.

Kadagiti marigrigat, sa la matungpal ken agbanag daytoy nga arapaapda babaen ti panagtrabahoda iti ballasiw taaw – iti uray sadino a paset ti lubong. Adu dagiti nagballigi a nakatun-oy iti arapaapda ngem adu met dagiti napaay.

Gapu iti rigat ti panagbiag, uray patadem kapten ti kailiantayo tapno laeng magun-odna ti nadur-as a masakbayan. Yan ti rigatna, daytoy ti makagapu a masansan a mabiktima wenno gundawayan dagiti managdakdakes wenno sindikato.

Kas iti panagawat dagiti kailiantayo nga agbiahe a mapan ballasiw-taaw iti paw-it. Saan a makapagkedked ti kailiantayo agsipud ta  maiyarikapanda iti $1,500-$3,000 tunggal biahe. Nabileg daytoy nga appan a dagus nga ammalan dagiti kailiantayo ta  makatawen a sueldo ti gagangay a mangmangged iti pagilian ti pakaisukatan dayta a gatad. Kadagiti dadduma, kumpetda iti patadem uray ammoda a pakaisagmakanda tapno laeng makaiggemda iti nawadwad a pirak.

Dagiti dadduma met, nabal-laiboda iti nasam-it a panag-dildila ti kalugaranda ket ina-watda ti paw-it wenno “pakisuyo” kadakuada a didan inusisa no ania dayta a paw-it. Naladaw idi naduktalanda a kontrabando gayam ti paw-it ket nairubodan a puon ti  nakaibaludanda.

Sabali laeng dagiti kalugarantayo a dida ammo a para deliber iti kontrabando ti simrekanda a trabaho iti ballasiw taaw. Uray dida koma kayat, saandan a makapagkedked pay ta addadan sadiay ken aglalo no pimmuslitda laeng iti nasao a pagilian. Awanen ti maaramidanda no di agtungpal lattan ti maibilin kadakuada.

Maaw-awagan dagitoy a mangmangged iti ballasiw taaw iti drug mules. Nagbalin  a sabali pay a siit iti karabukob ni OFW ken nangmantsa iti imahe dagiti mangmangged iti ballasiw taaw.

Iti agdama, nadaras unay ti panagsaknap daytoy a modus operandi ta addan iti pagilian dagiti gamat dagiti sindikato a mangbikbiktima kadagiti OFW ken agbibiahe a Pinoy. Karaman ditoy ti western syndicate – ti West African drug ring. Pammaneknek iti daytoy ti pannakatiliw sadiay Pampanga ti maysa a grupo dagiti sindikato a taga-Nigeria.

Ti saan nga ammo dagitoy a drug mules ket sopistikado dagiti ramit dagiti airport a pangduktal kadagiti mailibas a maiserrek a kontrabando. Uray nailemmeng ti kontrabando iti uneg ti mabagbagi ti babai, maidait iti bagi, maidulin kadagiti nalimed a compartment dagiti travelling bags ken sapatos, naipasagepsep kadagiti tisiert santo maibilag , wenno matilmon a nakaplastik tapno mailemmeng iti uneg ti buksit, madetek amin dagiti x-ray machine kadagiti eropuerto. Iti pay laeng eropuerto ket matiliwen ti agipuslit.

Kaaduan kadagiti natiliw  sadiay Macau, China ket immabuten iti 207 ken  nasentensiaanen iti death penalty dagiti 77. Sumagmamano ti natiliw sadiay Brazil, Chile, Peru, Ecuador ken dadduma pay a pagilian ti Asia ken Middle East.

Sumangsango dagiti dadduma iti death sentence. Pannakaibalud iti naunday a panawen met kadagiti dadduma pay. Agdagupen iti 678 ti bilang dagitoy a pakaibilangan dagiti 425 a babbai nga agedad iti nagbaetan iti 25 agingga iti 55.

Uray dagiti seafarer wenno seaman ket nabiktimada met kadagiti dida ammo ti naggianna a paw-it a puon ti pannakadadael ti masakbayanda.  Iti sabali a bangir, adda dagiti nasulisog nga immawat iti paw-it gapu iti kadakkel ti maited kadakuada a kantidad a puon ti nakadadaelanda. Ta nagtungpal a blacklisted dagiti natiliwan ket awanen ti kompania a mangayat a mangawat kadakuada!

Ngem apay a kaay-ayo dagitoy  a sindikato dagiti Pinoy nga allukoyen?

Tallo dagiti mapaliiw a rason. Umuna, nalaing ni Pinoy iti Ingles ken dadduma a lengguahe. Uray sadino a suli ti lubong ti papananna ket saan a maiyaw-awan agsipud ta makasao iti Ingles. Maikadua, nalaing nga agaramat iti kompiuter, ti kapaspasan a komunikasion iti agdama. Iti kompiuter, lalona kadagiti networking sites ti maysa a pagrekrutan dagiti sindikato. Maikatlo, gapu iti gagemda a mapanawan ti kinakurapay.

Kas nadakamaten, saan a matungpal amin nga arapaap, Lalo dagiti darepdep a nalaokan iti saan a maiparbeng ken maikaniwas nga aramid.  Dumtengto latta ti panawen a panagpullo ti sinisikap nga aramid.

Kadagiti OFW ken Pinoy travelers, agpanunotda koma iti maminggasut (wenno maminribu)  sakbay a serkenda dagiti illegal ken maiparparit nga aramid.#

Comments are closed.