Footer

SARITA: Ti Kopunban iti Dalluyon (Umuna a paset)

“MARINELLE…” naiyesngaw ti baro.

“Di maiparbeng ti agdarasudos, kunak manen. Di maitutop nga aramid. Maspak ti tao a marud-ak kadayta,” nabagas ti perreng ni Marinelle. “Nasken a planuen ken adalen a nalaing ti aniaman nga ikeddeng sakbay nga aramiden.”

Dakkel ti panagkedked ti balasang iti proponer ni Jerry nga agkallaysadan. Total, aguppaten a tawen nga inda agayan-ayat. Agpadada nga agedad iti duapulo ket tallo.

Nagabayda a nagtugaw iti kasla luppo a gabat iti rabaw ti tangrib. Saanda nga inkaskaso ti umapgad nga ibuybuyog ti puyupoy.

“Maamakak…” imbaw-ing ni Jerry dagiti paningkitenna kadagiti agung-ungor a dalluyon nga agburak kadagiti katangriban iti Paraiso ni Juan. Nauneg ti sennaayna a pinug-awan ti umapgad a puyupoy. Sumirsiripen ti init iti tuktok ti bantay iti dayaenda.

Ti Virgin of Waves iti pantok ti dakkel ken nangato a tangrib ti nakaipigketan dagiti paningkiten ni Marinelle. Ti rebulto ket immuntar dita ti Ari ti Pelikula a ni Fernando Poe, Jr. idi nagsiutingda iti pelikula a napauluan iti “Alupihang Dagat” ken nagbidaanda ken ni Elizabeth Oropesa tapno adda ti pakalaglagipan ti ili a Narvacan kenkuana.

Tinaldiapan ni Jerry ti relo iti kannigid a pungupunguanna. No aggapudan iti simbaan iti Domingo, agdiretso metten ditoy Paraiso ni Juan dagiti agayan-ayat. Paboritoda a tugawan dayta gabat a naibalagbag iti rabaw ti katangriban.

“Ania  koma ti pagamkam?” imperreng ti balasang, ngem manutsutil ti isemna.

“Diak kayat a mapukawka iti biagko…”

“Kastaak  met a…!” nagkatawa ni Marinelle sa nagsadag ken ni Jerry kalpasan a simmallabay. Sumileng ti pagat-abaga a buokna ken ti kayumanggi a kudilna. Kasla naipigket ti maong a suotna iti nawasnay ken nasippukel a luppo ken gurongna. Ad-adda a kimmarit ti plastar ti barukongna iti kumepkep a nalabaga a tisiertna. Ngem  kangrunaan ti amin, awit dagiti matana ti raniag ti nakatangkayagen nga init.

Agkabarangayanda iti Barangay San Antonio — iti Sitio Cabatu ti balasang ken iti Sitio La Loma met ti baro. Dagiti laeng nakadippa a kinelleng  ken ti eskuela elementaria iti abaga ti kalsada probinsial ti nagbaetan dagiti dua a sitio. Nagkaeskuelaan dagitoy agayan-ayat iti elementaria ken iti sekundaria. Isu nga asideg ti rikna ti tunggal maysa.

Agpadada a saan a nakapagkolehio. Ni Marinelle, nagadal nga agpukis, agkulot, ag-pedicure ken ag-manicure ken nakastrek iti maysa a beauty shop iti tiendaan ti Narvacan. Ni Jerry, impamaysanan ti agtrabaho iti bangkag.

Uliten koma manen ni Jerry ti arungaingna iti balasang, ngem dinan naulit ta naipigket dagiti paningkitenna iti kuponban a napandagan iti kasla gemgem a nakirsang a bato. Naminlima ngatan a tinaldiapanna daytoy ken minulmolan ti mugingna no asino iti nangpandag kadayta nakupin a kuponban iti bato. Ginaw-atna sana binidingna. Inukradna ti nagkapat a kupin ngem awan ti nakasurat. Saanna a masinuo ti kaadda ti kuponban iti rabaw ti tangrib. Ngem binalabala ti utekna, a nalabit nga inkabil dita dagiti agtutubo a nadanonda itay.

“Agurnongta pay. Nasaysayaat met laeng no adda urnongta sakbay a sanguenta dayta a banag. Narigat ti agassawa nga awan ti pagtugawanna a kunada. Namaymayat met laeng no adda dulin a sidadaan a kauten. Ti agsakbay, maarus pay. Adu urnongmon?” inyisem ti balasang sana kinuddot ti kannawan a luppo ti baro.

Kasla narunaw nga asin iti panagrikna ni Jerry. Dina kinabaelan ti perreng ti balasang. Adtoyen ti agdadata a kinapudno. Awan ti urnongna. Apagisu laeng a nasubbotna ti gastosna iti panagmulana iti lasona ken bawang. Kasla napespes ti pusona iti bain.  Nagulimek. Adda sugnodna iti lubong a di kinabaelan nga inalay-ayan ti nauneg nga anges.

“Adda urnongko a bassit,” inwang-it ni Marinelle ti pagatsiket a buokna nga ap-aplawan ti puyupoy. Ay-ayamen met ni Jerry ti ginaw-atna a kuponban. “Isu a nasken nga agurnongka met. No addanton naan-anay nga urnongta, satanto panunoten ti panagkallaysa. Nairut ti aangsan ti agassawa nga awan iti pagtugawanda. Patiek dayta ta balakad dagiti nagannak kaniak. Amin a balakadda ket mamatiak ta dadakkelko ida. Ad-adu ti nainum a danum dagiti nagannak isu nga ammoda ti pagsayaatan dagiti annakda. Maawatannak koma.”

Immanges iti nauneg ni Jerry. Timmakder. Adayo ti turong dagiti matana kalpasan a binulosanna manen ti nauneg a sennaay. Ay-ayamen pay laeng ti kanawan nga imana ti kopunban.

Timmakder met ni Marinelle. Nainayad ti panangdutdotna iti agkupasen a kupon nga ay-ayamen ni Jerry.

“Apay a linukotlukotmo?” kinuna ti baro.

Nabagas ti isem ti balasang sana imbarsak ti kuponban iti mangrugin nga agburak a dalluyon. Linukotlukot ti dalluyon ti kuponban a nagburak iti dakkel a tangrib iti masanguananda. Sinaruno manen ti maysa pay a sabuag ti dalluyon. Didan nasiputan no sadino ti nangitaneban ti dalluyon iti kopunban.

Tinaliaw ni Jerry ti balasang. Agsalsaludsod dagiti matana.

“Ti darasudos, maiyarig kadaydiay a kuponban. Maarinebneb. Namak payen no di makalung-aw? Kasta ti kaiyarigan ti ibagbagak kenka a panagsakbay. Maawatannak kadi…?”

Immanges iti nauneg ni Jerry. Nagtung-ed nga immisem. Nagpinnetpetda. Ket binuyada manen dagiti nadawel a dalluyon.

(Adda tuloyna)