Footer

TARAON TI BIAG: Ti Pagrebbengan ken Pammati (Tuloyna)

Saan a nagtimek ti doktora a nangpaliiw ken ni Eliza. Agyugyugyog dagiti abaga ti pasiente iti panagsangitna.

“Saanka kadi a mamati iti Dios? Saanka kadi a mamati ken Apo Jesus, Eliza?” sinaludsod ti doktora.

“M-mamatiak, d-doktora…”

“Met la gayam! No mamatika ken Apo Jesus, apay ngarud a dimo denggen dagiti Saona?”

Timmakder ti doktora. Kinamangna ti bassit a lamisaan iti kannigid a sikiganna a nangiparabawanna itay iti panakkelen a nangisit a lalat a shoulder bagna. Inruarna iti uneg ti bag ti maris brown a Biblia, sa nagsubli met laeng nga insigida iti tugawna.

“Mn, agurayka, ammom kadi ti kinuna ni Apo Jesus maipapan kadagiti ubbing? Sikogmo dayta, addan iti uneg ti saklolom. Isu a nasken a biagem a kas pagayatan ni Apo Jesus.”

Saan a simmungbat ni Eliza. Namrayanna ti nagdumog a nangapput iti rupana babaen ti dua a dakulapna. Agsasaibbek pay laeng.

Inukag ti doktora ti Biblia. Binasana: “Manipud iti Ebanghelio ni San Marcos 9:37. ‘Ti umawat iti maysa kadagiti kakastoy nga ubbing gapu kaniak, siak ti awatenna. Ket ti umawat kaniak, saan laeng a siak ti awatenna no di pay ti nangibaon kaniak.’”

Inikkat ti Eliza ti apputna iti rupana. Nupay agsasaibbek pay laeng, nakaparabawen dagiti dakulapna iti saklotna. Nakadumog latta.

“Uray iti Ebanghelio ni San Mateo 19:14: ‘Palubosanyo dagiti ubbing nga umay kaniak,’ kinuna ni Jesus. ‘Diyo paritan ida ta dagiti kas kadakuada ti agtagikua iti Pagarian ti langit.’

Saggaysan ti saninglot ni Eliza. Idi agangay, inyangadna ti rupana ket pinerrengna ti doktora.

“Uray iti Ebanghelio ni San Lucas 18: 16-17 kuna ni Jesus: Palubosanyo dagiti ubbing nga umay kaniak. Diyo paritan ida, ta dagiti kas kadakuada ti agtagikua iti Pagarian ti Dios. Laglagipenyo a dinto makastrek iti Pagarian ti Dios ti siasinoman a di umawat iti daytoy a pagarian a kas iti panangawat ti maysa nga ubing.’

Indisso ti doktora ti Biblia. Minatmatanna ni Eliza.

“Dagita ti mangipaneknek, Eliza, a napateg, nakapatpateg la unay ken Apo Jesus ti biag ti maysa nga ubing. Ita, iregregmo kadi pay laeng dayta im-imetem?”

“Ngem kasanoakon, doktora? Mabainak la ketdi.”

“Awan ti nasken a kabainmo. Adun ti kas kenka ngem situturedda a simmango iti pannubok ti biag. Maysa laeng a pannubok kenka dayta. Saanmo koma nga isukat ti pammatim iti Dios iti makunkuna a plastik a panagbiag. Ti kunam, no iregregmo dayta, malisiam kadi ti singir ti konsensiam? Malisiam kadi ti sidir ti Dios? Iti kaadalem ti naulimek a rabii, mariingka wenno riingennaka ti konsensiam iti inaramidmo. Iti panawen a naulimek, mariknam ti sidir ti Dios. Agnanayon kadi a kabaelam dayta a banag, Eliza?”

Nagulimek ni Eliza. Nagdumog.  Ngem nakaparabaw pay laeng dagiti dakulapna iti saklotna.

“Adu, wen, adu dagiti babbai nga agtarigagay nga agbalin nga ina. Ta parabur ti Dios ti panagbalin nga ina. Parabur ti Dios ti anak. Isu nga adu dagiti umar-araraw iti Dios a maaddaanda koma iti anak. Nagasatka, wen, nagasatka ta agbalinka nga ina a saan ket a kas kadagiti dadduma a saanda a mabalin ti aganak iti kaanoman. Malagipmo kadi pay ni Miss Universe Sushimita Sen iti sungbatna iti question and answer portion? Kunana: The essence of a woman is to become a mother. Ti panagbalinna nga ina ti kangrunaan nga akem ti babai.”

“N-ngem… ngem  parikutko, doktora, ti mangasikaso…”

“Iti panagpasngaymo, kasta kadi?”

“K-kasta ngarud, doktora….”

“Adda gayyemko nga agserserbi iti Dios babaen ti libre a panangtulongda kadagiti aganak a balasang. Mabalinka nga irekomenda kadakuada. Dika madanagan, siak ti doktorada. Isu a siguraduek a nasalun-at ti ipasngaymo nga anak!”

(Adda tuloyna)

Comments are closed.