Footer

BANNER NEWS: Ilocos Sur, napili a pakairusatan proyekto iti climate change

VIGAN CITY – Napili ti Ilocos Sur a maysa kadagiti probinsia a pakairugian ti maysa a proyekto mainaig iti panagbalbaliw ti klima, daytoy ti impadamag ti provincial planning and development coordinator ditoy probinsia itay nabiit.

Kinuna ni Dr. Enrie Mendoza II bayat ti pannakainterbiona idi Enero 12 a karaman pay kadagiti probinsia a pakaipaayan ti nasao met laeng a proyekto dagiti tallo pay a probinsia ti Rehion Uno a pakairamanan ti Ilocos Norte, La Union ken Pangasinan.

Segun ken ni Mendoza, maysa a surat manipud ken ni Leonardo Quitos Jr., regional director ti National Economic and Development Authority ti naipaima ken ni Gov. Luis “Chavit” Singson a mangipakpakaammo a ti Ilocos Sur ti maysa kadagiti umuna a probinsia a pakaipaayan ti proyekto ti ahensia nga “Integrating Disaster Risk Reduction and Climate Change Adaptation in Local Development Planning and decision-making Processes”.

Babaen itoy a proyekto mairamanen a pakaseknan ti  Provincial Development and Physical Framework Plan (PDPFP) dagiti probinsia  ti panagbalbaliw ti panawen ken pannakakissay ti epekto ti kalamidad ket katinnulong ti National Economic Development Authority (NEDA) iti daytoy a proyekto ti United Nations Development Program  (UNDP) ken Australian Agency for International Development (AusAID).

“Saan a mailibak a dakkel a problema ti sibubukel a lubong ti panagbalbaliw ti panawen a mangituntunda itan iti adu a didigra kas iti  layus iti tiempo ti panagtutudo ken nakaro a pudot iti kalgaw. Very timely ngarud daytoy a proyekto ta maipaayan iti technical assistance dagiti karaman a probinsia babaen kadagiti eksperto kadagiti nadakamat a banag,” kinuna ni Mendoza.

Mainaig itoy, madaman ti pannakasimpa ti maysa a memorandum of agreement  tapno nakasagananton daytoy para iti panagpipinnirma iti kapitolio ti Ilocos Sur inton Enero 28, 2011.# 

Comments are closed.