Footer

COMMENTARY: Dagiti ibbong ti mangpabangsit iti imahe ti kapolisan

Mamatikami la unay nga ad-adu pay la nga amang dagiti disente a polis iti laksid nga addan dagiti mairepreport a rinuker a pannakabagi ti linteg. No itlog koma, kayariganda dagitoy a polis iti  ibbong no ikumpara kadagiti manakem ken nalinteg a kameng. Ngem dagitoy nga ibbong ti mangpabangsit iti kapolisan.

Ngem makapariribuk iti nakem dagiti nagsasaruno a napalabas a damag a nakainbolbaran dagiti ibbong a polis.  Kas dagiti nainbolbar iti serious grave abuse of authority. Kas ti maysa a polis Manila a nangrames iti maysa a vendor iti uneg a mismo ti presinto. Ti kidnapping for ransom a polis Quezon City dagiti mapapati a nangisayangkat. Ti pammaltog iti Talavera, Nueva Ecija a nakainbolbaran ni nabartek nga Inspector Bernardo Castro a nangpaltog iti hepena a ni Supt. Ricardo Dayag a nakatayan ti naud-udi. Ti bartek a polis Tondo a nangiwekwek iti kutsilio iti ulo ti maysa nga agtutubo. Ti polis Pasig a nupay saan a nakauniporme, nagbitbit iti baby armalite ken nangkarit kadagiti guardia iti maysa a mall iti tengnga ti kalsada kalpasan a sinitada gapu ta illegal ti panangiparkingna iti kotsena.

Saan a di mainsasaan nga addanto pay dagiti polis a maireport a nangabuso iti uniporme ken tsapada iti masakbayan. Dagitoy a polis ti mangibabbaba iti imahe ti kapolisan. Isuda ti makaigapu iti panagpababa ti panagraem dagiti umili iti polis.

Saan kadi a sinapataan dagitoy ti mangibayog ti kinalinteg ken pagtalinaedenda nga agnanayon ti linak ken kappia? Apay itan a mapaspasamak ti panangrugit iti napintas a nagan ti kapolisan? Apay itan nga adda dagiti abusado ken barumbado a kameng?

Adda la ketdi makagapu a di makita wenno no nakita man, nabaybay-an a rimmusing, rimmukbos ken dimmakkel. Adda la ketdi makagapu no apay nga adda dagiti timmubo ti sarana a kameng.

Daytoy koma ti rumbeng a takuaten, adalen ken sanguen dagiti mangidaulo iti kapolisan, ni PNP Chief Director General Raul Bacalzo, ken ti DILG nga idauluan ni Sekretario Jesse Robredo tapno saanen a dumakkel daytoy a ganna ti institusion, ta no saan, ad-adda pay nga agsuek ti panagtalek dagiti umili ket kumarkaro a lumidem ti rupa ti polis. Mapangnamnamaan ti linteg no dagiti enforcers wenno mangipatungpal itoy ket ar-aramidenda ti umno nga obligasion ken aramidda.

Umno la unay no marebisar ti wagas ti panagrekrut iti kapolisan ken no apay nga adda dagiti naiyaw-awan iti dalan ti panagserbi. Kas iti mula, nasken a kitaen no nabun-as wenno kuriteg dagiti bunubon. Wenno kas iti nakunatayo, nasken nga idasig dagiti rekrut no ibbong a puli wenno nabun-as ken maikari nga agserbi.

Kapaliiwan a naipakadawyanen ti pannakibiang dagiti dakkel ti natugawanda a puesto wenno dagiti nangato a nagan iti gimong iti panagrekrut ti kapolisan. No apay ketdi a masapul pay ti endorsement nga agtaud kadagitoy a tattao. Agsipud ta makautang dagiti rekrut iti naimbag a nakem kadagitoy a tattao,  didanto makapagkedked no  mausardanto para iti bukod nga intension ken panggep ti nakautanganda iti pannakaipuestoda.

Rumbeng laeng a maputed daytoy nga aramid. Patauden daytoy ti puesto dagiti saan a maikari  nga agpolis. Maparnuay pay ti loyalidad ti polis, saan a maipaay iti institusion a nakaikappenganna no di iti tao a nangipuesto kenkuana. Kapaliiwan a naturtured dagiti  rinuker a polis nga agisayangkat kadagiti saan a naimbag gapu iti kaadda ti pammatida a masalakniban ken addada iti proteksion ti nangipuesto kadakuada.  Sakbay nga agrukbos daytoy, rumbeng la unay a marangawan no di man mapugipogen.

Umno la unay a makibiang metten ti Commission on Human Rights nga idauluan ni Etta Rosales agsipud ta kas kuna ti commissioner,  nakarkaro pay ti polis a nagaramid iti panagabuso ngem iti maysa a kriminal ta rumbeng koma nga isuda dagiti mangprotektar kadagiti umili kadagiti abusado. Saan a maikanatad a daydiay mangsalaknib ken mangtagiben iti urnos ken talna ti agabuso ken mangsalungasing iti linteg.

Nupay kasta, mangnamnamakami a rumbawan  latta dagiti nalinteg nga aramid dagiti killo. Iti nagan ti linteg, agnanayonto latta a makinrabaw ti hustisia. Daytoy ti agdadata a kinapudno. Daytoy ti kapkapnekan ti amin. Saan nga agnanayon a rabawan ti kinadakes ti naimbag nga aramid. No adda dagiti ibbong nga agiwarwara iti kinabangsit, mamatikami nga ad-adu pay laeng dagiti napudno iti panagserbida. Dagitoy dagiti dedicated police officer and a gentleman.

Di ngarud maukas ti pammatimi nga adu pay laeng ti nadayaw ken nabanglo ti naganna a kameng ti kapolisan a madadaan a mangipatungpal  iti kinalinteg.

“Hindi po naman lahat ng mga pulis ay masasama. Karamihan po sa amin ay mabubuting pulis na gumaganap ng tapat sa tungkulin at nakahandang isakripisyo ang buhay para magampanan ang aming trabaho,” di nagawidan ni Pasay City Senior Inspector Renato Apolinario ti saibbekna a nangibalikas iti daytoy kalpasan a binitinan ni National Capital Region Police Office chief Director Nicanor A. Bartolome iti medalia, ti Medalya ng Kagalingan.

Maipalagip a napadayawan ni Apolinario gapu iti pananglappedna iti pannakakidnap ti maysa a lalaki idi napan a tawen. Ti nakas-ang, pannakabagi ti polis ti Quezon City dagiti kinapinnaltogna a nangisayangkat iti napaay a panaghold-ap!#

Comments are closed.