Footer

SARITA: Ti Kopunban iti Dalluyon (Maikatlo a paset)

“RABIIN, Jerry, barok, dika kadi pay nga agawid?”  pinasardeng ni Tang Asiong ti nuang nga agguyguyod iti pangga a nakailuganan ti generator a pinagpalayasna iti mulana a mais idi nalabsanna ti baro. Agpalpalayas met ni Jerry iti lasona a kaab-abonona idi duan nga aldaw ti napalabas.

“Saan pay, tang, leppasek pay ti aramidko. Kamaten ti presio…!” nagkatawa ti lakay.

“Addan sa met sagsaganaam, barok, ta doble ita iti kinagagetmo?”

Nagkatawa laeng ni Jerry a nangisimpa iti hose a pagtataudan ti nabuslon a danum a dumalan iti limbang dagiti lasona. Generator met ti aramatna.

“Agunikayto met a, kaanakankanto metten!” nagkatawa manen ti lakay iti bukot ti nuang. Kaanakanna ni Marinelle, ta anak ti adingenna a babai.

“Agurnongkami kano pay, tang…

“Ket no dakkel sa ti nakuartam iti immuna nga apitmo?”

Saan a nagtimek ti baro. Nagkatawa laeng. “Apagsubbot, tang…”

DUA a lawas ti napalabas. Napan  manen ni Jerry iti department store tapno sirpatenna manen ti kuwentas iti eskaparate. Ngem anian a nagdakkel ti pannakaupayna idi makitana nga awanen ti kuwentas.

“Nagatangen a, manong.” kinuna ti saleslady a nagsaludsodanna.

“Kaano pay?”

“Idi naminsan nga aldaw. Maysa a lalaki ti gimmatang.”

Nakarikna iti nalaus nga upay.

“Ania ti langa ti lalaki?” dina napupuotan a sinaludsod.

“Narapis ken pamandeken. Napudaw ngem addaan iti naraniag a mata. Ngem ad-adda a madlaw kenkuana ti dakkel ken nangisit a sallapiding iti tuktok ti agongna.”

“Ni Randy!”

“Wen, kasta ti imbagana a naganna idi dinamagko, manong. Empleadon sa dita kapitolio.”

“Ania pay ti imbagana?”

“Iregalona kano iti nobiana ta umadanin ti kallaysada.”

SAAN a matimtimek ni Jerry a nagawid. Saanna a maiwagat ti dismayana. Nalaus a pannakadismaya. Mulmulmolan ti mugingna no apay a naaramid ti kasinsinna ti kasdiay. Di met imbagana idi nga iyurnonganna? Sagutna koma ken ni Marinelle. Apay a makiinnagaw ti kasinsinna? Saanna a maawatan.

Kellaat lattan a nagburek ti darana. Agbuangeren ti mariknana. Naggagatel pay dagiti rapas a dakulapna. Saanna a nagustuan ti napasamak.

“Gapu kadi ta napanglaw la dataon,” naiyesngawna ket uray la ngimmato dagiti kiday ti estudiante a babai a katugawna. Ngem di inkaskaso ni Jerry. Minisuotanna ketdi ti likudan ti agtutubo idi nagdardaras nga immalis iti tugawna iti sango idi adda  bimmaba iti Sacuyya Norte iti ili ti Santa. Minulmolan manen ti mugingna ti pananggatang ni Randy ti kuwentas.

Iti law-ang, naurnong dagiti nangisit nga ulep iti bandana ti abagatan-a-daya. Nalamiis ti aplaw ti puyupoy manipud iti baybay. Saanen a kuminnit ti darang ti init.

Agkasarda gayamen ken ni Wendy. Napintas ni Maestra Wendy. Mangisursuro iti Grade II iti San Antonio Elementary School a barangayda. Agkabagayanda unay.  Ngem apay a saan a gimmatang iti sabali nga iregalona ken ni Wendy?

Kastoy kadin ti biag ti nakurapay? Maunaan iti kayatna a gatangen? Kinagatna ti makimbaba a bibigna. Nariknana manen ti panagburek ti barukongna.

Marinelle…Marinelle…! inyikkis ti kaungganna.

No saan nga inlaaw ti konduktor ti kinaaddada iti crossing iti pagdissaagan iti Narvacan, di pay koma bimmaba. Ditoy ti dimsaaganna ta dumagas iti tiendaan a gumatang iti mulio a pangrabianda. Kaay-ayo ngamin ti amana ti mulio – dinardaraan a kuna dagiti dadduma.

Ngem saan latta a pumanaw iti panunotna ti inaramid ti kasinsinna uray idi rummuaren iti tiendaan a bitbitna ti naisupot a mulio.

“Panangliput daytoy nga inaramidmo, kasinsin,” naiyesngawna. “Ania aya ti nagbasolak kenka?”

Minisuotanna ti drayber ti traysikel a dandani nangdaplis kenkuana. Pateltelankanto pay, litsim! inyikkis ti mugingna.

“Maysa pay, p’re! Maykan ta intayon!” inyawis ni Abat a traysikel drayber. “Madama ti siat da kasinsin Ittor, nagparti iti kalding. Umayka ketdin ta inta met rumaman!”

Imbaltogna ti kutitna iti likudan ni Abat. Pinaburbor daytoy ti motor sakbayna a pinatarayna.

Nalang-ab ni  Jerry ti  asuk ket nadegdegan ti agburburek a riknana.

(Maigibusto)

Comments are closed.