Footer

SALAYSAY: Debosion iti Nangisit a Nazareno: naidumduma a pammati (Umuna a paset)

Iti kallabes a tinawen a nasagraduan a piesta ti Nangisit a Nazareno wenno Señor Jesus Nazareno wenno Nuestro Padre Jesus Nazareno de Quiapo, naimatangan ti sangalubongan ti naidumduma a pammati dagiti Filipino ken Apo Jesus. Minilmillion dagiti nagsakasaka a deboto a simmurot iti prosision, nakilinnetlet tapno makaasideg iti karro ken maiggamanda uray laeng ti dapan wenno pagan-anay ti Nazareno wenno aniaman a paset ti bagina idinto nga adu ti nangikuyog iti aruaten kas iti kamiseta, tisirt, panio ken dadduma pay a patienda a no maiyapros iti Nazareno ket maikkan iti birtud wenno bileg wenno salaknib kadakuada.

Ngem kaadduanna ti tinawen a mapan makiprosision agsipud iti debosionda iti Nangisit a Nazareno. Kadagitoy a kailian,  saan a magatadan ti rikna ken pannakakimaymaysada ken Apo Jesus iti daytoy a pannakiprosisionda wenno pannakipartisiparda, nagpaiduma a rikna a mangiparangarang iti nauneg unay a relasion dagiti deboto iti Mannakabalin.

Historia ti Nangisit a Nazareno

Tinawen a maselebraran ti Nangisit a Nazareno tunggal Enero 9. Maysa daytoy a kayo nga estatua ni Hesukristo a naidulin iti Minor Basilica ni Nangisit a Nazareno iti Quiapo, Manila.

Adu dagiti mamati a milagroso ti nasao nga estatua kas pinatalgedan dagiti naimbagan ti sakitna ken dagiti simmayaat ti panagbiagda gapu iti tinawen a debosionda a makipartisipar iti prosesion ni Nangisit a Nazareno iti pannakaselebrar ti piestana.

Saan nga am-ammo ti Mehikano a nangkitikit iti Nazareno.

Kasta met a saan kano a dati a nangisit ti estatua, ngimmisit gapu ta nairaman a napuoran idi nauram ti bapor a nagkarga iti daytoy. Maibilang a maysa a milagro ti saan a pannakaan-ano ti estatua iti baet a napuoran.

Inkuyog dagiti misionero ti Augustinian Recollect ti Nazareno iti Pilipinas idi Mayo 31, 1606. Nagtaeng kadagiti nadumaduma a simbaan kas iti Recollect church iti Bagumbayan, ti simbaan ni San Nicolas de Tolentino, ken iti Quiapo church a paggigianna agingga ita.

Idi 2007, sinelebraran ti Black Nazarene ti maika-400 a tawenna.

Nupay adda impaulog ti Catholic Bishops Conference of the Philippines a ballaag a “saan a panagdaydayaw iti imahe” agsipud ta maaramat laeng daytoy para iti benerasion, saan a nalapdan daytoy ti idadar-ay dagiti minilion a tattao tunggal panagpiestana iti Enero 9.

Ngem saan a nailaksid iti imatang ti dua a Santo Papa daytoy a debosion dagiti Pilipino iti Nangisit a Nazareno. Idi 1650, inted ni Papa Innocent X ti bendisionna babaen ti Papal Bull a mangipasdek iti  Cofradia de Santo Cristo Jesus Nazareno wenno Confraternity of the Most Holy Black Christ Nazarene. Inulit ni Pope Pius VII daytoy a bendision babaen ti panangited iti plenaria nga indulhensia kadagiti deboto nga agkararag iti imahe ti Nangisit a Nazareno iti Quiapo.

Iti panaglabas dagiti tawen, immadu dagiti tattao a makipartisipar iti prosesion ti Black Nazarene. Agaruat dagiti deboto iti maroon, kas iti aruaten ti imahe ket kaadduanna ti sakasaka kas ken ni Jesus idi awitenna ti krus agingga iti Mount Calvary a nakailansaanna.

Iti selebrasion ti panagpiesta ti Black Nazarene iti daytoy a tawen, mapattapatta a 7 agingga iti 8 milion dagiti tattao a nakipartisipar iti prosesion iti baet a nagtudo sakbayna. Ginasut met dagiti naireport a naitaray iti ospital gapu iti pannakadunorda ken pannakatalimudawda gapu iti panaglilinnetlet ken panagdidinnuron dagiti deboto tapno laeng makaasidegda iti estatua ken maaprosanda uray gayadan laeng ti aruaten ti Nazareno. Nupay kasta, awan ketdi ti naireport a natay iti prosesion, saan a kas kadagiti napalabas a tawen nga adda kasualidad.

Nagpaut ti prosesion wenno Translacion manipud iti alas 7:30 ti bigat iti Quirino Grandstand kalpasan ti Nasantuan a Misa agingga iti alas 12:07 ti sumaruno nga aldaw iti Quiapo Church wenno iti nasurok a 15 nga oras!

Idi simmangpet iti arubayan ti Quiapo, iti umuna a gundaway, sinabat dagiti fireworks ti Nangisit a Nazareno.

Kasta kauneg ken kapateg ti panagdeboto dagiti minilion a tattao ken ni Black Nazarene!

(Adda tuloyna)

Comments are closed.