Footer

2 natay 3 nasugsugatan iti nagsisina nga aksidente

GALIMUYOD, Ilocos Sur – Dua ti natay idinto a 3 ti nayospital gapu iti aksidente a napasamak iti Vigan City,  Tagudin, Ilocos Sur ken ditoy nga ili idi Enero 30, Pebrero 1 ken 2.

Naireport a natay da Rogelio Gazmen y Dalmeg, 49, naasawaan, ken residente iti Barangay Abaya, ditoy nga ili, ken ni Alvin Alviar y Advincula, 24, naasawaan ken residente iti Rizal Street, Barangay VIII, Vigan City idinto a nasugatan da Delfino Nigos, Jr. y Viernes, 28,  naasawaan ken residente iti Barangay Kalawikiw, Salcedo, Ilocos Sur; Jeffrey Licudine y Guieb, 26, baro, mangisursuro ken residente iti Barangay Becques, Tagudin, Ilocos Sur ken maysa nga Arvin Hadlos y Pagaduan, 15, estudiante, residente iti Barangay Borono iti nasao met laeng a barangay.

Napasamak ti aksidente a nakatayan ni Gazmen iti Candon-Salcedo road a sakup ti Barangay Nagsingcaoan, Galimuyod idi agarup alas 6:45 ti Enero 30.

Segun iti inbestigasion, bayat ti panagsalog ti XRM 110 a motorsiklo ni Gazmen iti kalsada a sakup ti nadakamat a barangay, napukawna ti kontrolna iti manibela ket nakautna ti linia ti makasabatna a traysikel a minaneho ni Nigos  a puon ti nagdinnungparan dagiti dua a lugan.

Naitaray ni Gazmen iti Candon City Hospital ngem pimmusay bayat ti pannakataming iti ospital. Nagsagrap met iti dunor iti makannigid a saka ken makannigid a ramay ni Nigos.

Iti met napasamak nga aksidente iti Vigan City, limtuad iti inbestigasion nga agdaldaliasat ni Alviar iti abagatan a direksion idi mapapati a dina nakalkula ti nagsulian a kurba ket direkta a dinungparna ti poste ti elektrisidad iti abaga ti kalsada iti dayaen ti Vigan Hotel.

Nagsagrap ti biktima iti nakaro a sugat iti ulo ket nupay naitaray iti Metro Vigan Cooperative Hospital, pimmusay ditoy kalpasan ti sumagmamano a minutos.

Iti panagimbestiga dagiti polis iti aksidente iti national highway ti Barangay Borono, naammuan nga agpaabagatan ti motorsiklo a nagluganan ni Licudine,  ti Honda TMX tricycle a minaneho ni Amante Pagaduan y Lanuza, 45, naasawaan ken residente iti Barangay Borono, Tagudin, Ilocos Sur, ken sabali pay a traysikel idi nagmenor ti traysikel ni Pagaduan tapno agsikko iti kannigid a puon ti panagpakannawan ti sabali a traysikel a sumarsaruno kenkuana tapno dina madungpar ti immuna  a nakadungparan met ti motorsiklo ni Licudine ti likud ti traysikel ni Pagaduan.

Gapu iti pigsa ti pannungpar, nagsagrap iti nakaro a dunor da Licudine ken ti pasahero ti traysikel a ni Hadlos ket naitarayda iti Tagudin General Hospital sada naiyalis iti maysa nga ospital iti San Fernando City.#

Comments are closed.