Footer

Bag ti negosiante, inagaw 2 lalaki a nagkalubbon iti motorsiklo

TAGUDIN, Ilocos Sur – Maysa a babai a negosiante ti nagbalin a biktima ti hold-ap babaen dagiti lallaki a nagkalubbon iti motorsiklo iti provincial road ti Barangay Del Pilar, ditoy nga ili iti pasado alas 12:20 ti rabii idi Enero 31.

Nagpulong iti polis ditoy ni Liza Nazra y Daep, 46, naasawaan, negosiante ken residente iti Rufina Subdivision, Parian, San Fernando City nga inagaw ti maysa a mannipdut ti bagna a naglaon iti kuarta, alahas ken identification cards.

Segun ken ni Nazra, maysa pay nga agpapautang iti kuarta, naglaon ti bagna iti sumurok-kumurang P30,000, agduduma nga alahas ken identification cards.

Iti inisial nga inbestigasion dagiti polis ditoy, aglugan koma ni Nazra iti kotsena a nakaparking iti nadakamat a provincial road iti Barangay Del Pilar idi kellaat nga immasideg ti maysa a lalaki sana inagaw ti bagna.

Nagpaarayat ni Nazra ket kinamat dagiti agindeg ti suspek ngem kellaat a nagbangen ti kumplotna a nakaarmas a lalaki a naglugan iti motorsiklo sana pinaturongan iti paltog dagiti kumamkamat.

Naglugan ti nangagaw iti bag iti motorsiklo ket naglibasen dagiti dua iti amianan a direksion.

Nangiwayat dagiti polis iti hot pursuit operation ken panag-checkpoint ken pinakaammuanda dagiti kabangibang a police stations ngem nakalusot dagiti dua a suspek.

Kabayatanna, naireport a natakawan ti maysa a pagtagilakuan iti gas a pagluto idi rabii ti Pebrero 1.

Inreport ni Franklin Aquino y Mapili, 26, naasawaan, caretaker ti AFM Shellane Center a masarakan iti Rizal Street, Barangay IV, Vigan City, ken residente iti Barangay Bulala, Vigan City, a naduktalanna a naputed ti kandado ti main door ti pagtagilakuan ken naporsar a naluktan idi mapan aglukat iti agsapa ti Pebrero 2.

Kinasakas dagiti di pay ammo ti bilangda a mannanakaw ti P8,000 a kuarta a naikabil iti drawer ti lamisaan sada binunag ti pito a unit ti tangke ti gas.

Iti pannakaisurat daytoy di pay ammo ti kinaasino dagiti mannanakaw.#

Comments are closed.