Footer

BANNER NEWS: Chavit kadagiti intrigero: urayenyo a malpas ti kaso

Dinawat ti gobernador ti Ilocos Sur kadagiti agilinlinteg iti Kamara nga urayenda pay a malpas ti kaso ti anakna iti Hong Kong sada agtignay a “mangkugtar” kenkuana.

“No malpas ti kaso, mabalinda nga aramiden latta ti kayatda nga aramiden… libreda a mangkugtar (ken ni Cong. Singson),” kinuna ni Gov. Luis “Chavit” Singson bayat ti interbio kenkuana ni Jun Ramos a naipatangatang iti DWRS idi Pebrero 4.

Pinalagidan pay ni Singson dagiti intrigero a manglilibeg iti kaso nga amkenna a makapadagsen iti kaso ti anakna a ni Dip. Ronald Singson.

Inkalintegan ti gobernador nga “awan ti pinatay ti anakna, awan ti rineypna, awan ti dinangranna a tao, ti laeng bagina ti dinadaelna…” idinto nga inyunay-unayna a maysa met a “biktima ti droga” ti diputado.

Inadmitir ni Dip. Ronald Singson dagiti charges a panagikut iti droga iti Hong Kong District Court ngem para kenkuana laeng.

Inadmitirna pay a nagar-aramat iti droga gapu iti pressure iti politika, ti negosiona ken problema ti relasionna iti nobiana.

Kinuna ti agilinlinteg nga on and off a nagusar iti cocaine manipud pay idi 2004 ket makasinglot iti manipud iti uppat agingga iti lima a gramo iti maysa nga aldaw.

Nagpadispensar ni Singson kadagiti umili ti Hong Kong idinto nga innayonna a “dakkel a biddut (ti naaramidna) … a “nakaperdian ti nagan ken reputasionko, pannakaibabain ti pamiliak ken namataud iti pannakapasakit iti girlfriendko.”

Dinawat pay ni Singson ti leniency iti judge a mangsentensia kenkuana.

Kinuna ni Ilocos Sur Gov. Luis “Chavit” Singson a kapilitan nga inannugot ti anakna a diputado nga isu ti agikut iti droga agsipud ta nasukalan dagiti otoridad kenkuana ngem inyunay-unayna a ti nakumpiska iti diputado ket para personal a kasapulanna, saan a tapno ilakona.

Naaresto ni Singson iti Chek Lap Kok International Airport ti Hong Kong idi Hulio 17, 2010 kalpasan a nasukalan iti ikutna ti cocaine nga agdagsen iti 26.1 grams ken dua a tableta ti Valium.

Nupay kasta, nagbalin laengen a 6.1 grams ti cocaine  kalpasan a saan a nairaman ti botelia a nakaikabilanna ket temporario a nawayawayaan ti diputado kalpasan ti panagpiansana iti HK$1 million babaen ti tulong ti dua a gagayyemna iti Hong Kong.

Istrikto ti Hong Kong iti pannakaipakat ti lintegna maikontra iti droga. Iti babaen ti linteg daytoy a pagilian, maibilang a trafficking ti panangiserrek iti droga iti teritoriana, para man iti personal a pannakaaramat wenno para lako wenno maiwaras.

Nag-inhibit ni Judge Stanley Chan gapu iti naawatna a poison letter a kunana a dina kayat a mangapekto iti iyetnagna a desision.

Kinuna ni Singson a masapul a makumbinsir ti anakna ti baro a judge a para kenkuana laeng ti droga ken saan a para lako.

Kinuna pay ti gobernador nga imballakad ti abogado iti anakna a nayonanna pay ti panangkumbinsirna iti hues tapno mapapatina daytoy a para usarna laeng ti droga.

Addaan ti drug trafficking iti maximum penalty a pannakaibalud iti tungpal biag ken multa a HK$5 million wenno aganay a P28 million.#

Comments are closed.