Footer

EDITORIAL: Agas-asimbuyok ti Garcia plea bargain deal

Tipping iti dakkel a bloke ti yelo ti isyo a plea bargain deal  ket in-inuten nga agsingaw ti nakaro a buyok a no saan a dagus a matakkaban, posible a permanente a mangdadael iti imahe ti AFP.

Iti pannakaisurat daytoy, simngaw a naikkan dagiti napalabas nga AFP Chief of Staff iti pabalonda iti panagretiroda.

No patien ni dati nga AFP budget officer, ni retirado a Lt. Col. George Rabusa, naikkan ni Angelo Reyes iti P50 milion idi nagretiro.

Malaksid kenkuana, mapapati a nakaawat met ni Diomedio Villanueva iti P160 milion, ken ni Roy Cimatu iti P80 milion.

Pinaglibakan ni Reyes ti alegasion ni Rabusa.Uray dagiti sabali pay a dinakamat ni Rabusa ket sigurado a paglibakanda met.

Pudno man wenno saan, saan koma a rimmuar daytoy no di gapu iti plea bargain deal iti nagbaetan ni dati a military comptroller Carlos Garcia ken dagiti government prosecutors.

Babaen ti nasao a katulagan, mapalubosan ni Garcia a mangisubli iti gobierno ti aganay P150 milion kas kasukat iti panangannugotna a nakabasol iti nalaglag-an nga offense a saan ketdi a plunder a nakaisaklanganna.

No plunder, madusa koma ni Garcia iti agingga iti 40 a tawen a pannakaibalud idinto nga addaan laeng iti minimum a sentensia nga innem a tawen ti nalaglag-an nga offense a direct bribery ken panaglabsing iti anti-money laundering law.

Gapu iti daytoy a katulagan, nakapagpiansa ni Garcia ket nawayawayaan iti pagbaludan idi Disiembre 16, 2010.

Madakamat ditoy a kas comptroller, ni Garcia ti nangiggem iti pondo ti militar, kasta met dagiti pondo manipud iti United Nations para kadagiti tropa a Filipino nga agpapaay a peacekeepers kadagiti nariribuk a pagilian ken pondo para iti joint exercises ti militar ken dagiti tropa ti Estados Unidos.

Ti makadakes ditoy, lumlumtuad a dagiti pondo nga agpaay koma para kadagiti soldado ket nakiraud tapno laeng adda maited a pabalon kadagiti agretiro a nangangato nga opisial ti AFP.

Kangrunaan nga ir-iruken dagiti soldado ti kinababa ti sueldoda, ti kadaan dagiti pakigubatda iti baet ti kaaddan ti programa ti modernisasion iti militar.

Adda pay daydi naipadamag a butbot dagiti botas dagiti soldado ken di pay agputok dagiti paltogda gapu iti kinadaanda ken depektibo a bala.

Masapul a maikkan iti naan-anay a pannakaresolbar daytoy nga isyo agsipud ta makaapektar la ketdi kadagiti soldado. Agasem a nagdadakkel ti benepisio dagiti nangangato nga opisial idinto a sangkapit-ing laeng ti maipan kadagiti soldado!

Rebbengna ngarud nga ibasura ti Ombudsman daytoy a plea bargain deal ken maiwayat iti naun-uneg nga inbestigasion tapno maammuan no kasano kauneg ti rinamaram dagiti alegasion ni Rabusa ken ti COA auditor tapno mapakatan ti pannusa dagiti nagabuso iti takemda ken tapno saanen a maulit pay ti kastoy a maar-aramid iti military institusion.

Ti laeng problema no agtalinaed a bulsek ti Ombudsman iti kinaserioso dagiti alegasion a di maikanatad a pannakaaramat dagiti pondo ti militar.#