Footer

Fun run, naisayangkat a pangidur-as iti turismo

CERVANTES, Ilocos Sur – Kas paset ti programa ti gobierno munisipal ditoy a pangidur-as iti turismo ken panangipasagepsep iti napateg a paset daytoy nga ili iti historia ti pagilian, naangay  ti kaunaan a pasalip iti taray idi Enero 29 ditoy.

Kinuna ni Mayor Benjamin Maggay a kinabinnulig ti gobierno munisipal nga idauluanna dagiti balikbayan a residente ditoy nga ili iti pannakaisayangkat daytoy kaunaan a Cervantes Fun Run a nakipartisiparan dagiti tumataray manipud iti Ilocos Norte, La Union, Pangasinan ken daytoy a probinsia.

Nasurok sangagasut a tumataray ti nakipartisipar iti 15-kilometer fun run iti sumalog a terrain manipud iti Bessang Pass agingga iti sango ti munisipio ditoy nga ili.

Malaksid kadagiti taga-Cervantes, nakipaset  pay dagiti sumagmamano a foreigner, balikbayan, nataengan ken babbai iti nasao a pasalip.

Ni Reynaldo Pascua, 42, taga-Laoag City, ti nagkampeon iti daytoy a torneo.

Inyawid ni Pascua ti $300  kas premiona. Immawat met ti nakagun-od iti maikadua a puesto iti $200 idinto a $150 iti maikatlo a puesto.

Kinuna ni Maggay a babaen ti nasao a pasalip, saan laeng a maipromot ti ili a Cervantes a kas napintas ken nalamiis a lugar a daywen dagiti turista no di pay maipasagepsep ti akem daytoy nga ili iti nabaknang a historia idi napalabas a maikadua a gubat ti sangalubongan.

“Bulan ti Enero ti panakaisayangkat ti fun run ta daytoy a bulan ti panangrugi ti iraraut dagiti gerilia ti United States Armed Forces in the Philippines kadagiti puersa ti Hapon manipud iti Bitalag, Tagudin agingga iti nadara a ranget iti Bessang Pass,” kinuna ni Maggay.#

Comments are closed.