Footer

SALAYSAY: Dagiti anek-ek ti kapolisan

Iti maysa nga interbio ti maysa nga opisial ti kapolisan, linagidawna ti saan a pannakaisaklang iti korte dagiti kaaduan kadagiti natiliwda a mannanakaw. Adda dagiti natiliwda a mannanakaw iti akto nga agisaysayangkat iti panagtakaw iti maysa nga establisimiento. Sabali laeng dagiti intudo dagiti saksi nga akin-aramid iti panagtakaw. Dagiti dadduma, binigbig dagiti natakawan babaen ti ladawanda nga adda iti ikut ti kapolisan.

Iti pannakatiliw dagitoy mannanakaw, rebbengna koma a maisaklangda iti korte tapno mapakatanda iti maikanatad a pannusa gapu iti panaglabsingda iti linteg.

Ngem ti lagidawen ti nasao nga opisial, saan metten a dumur-as ti kaso kalpasan ti pannakatiliw ti mannanakaw agsipud ta mapukaw metten ti interes ti natakawan nga agdarum pay agsipud ta dakkel laeng a taktak ken gastos iti biangna a mapan iti korte tunggal pannakausig ti kaso.  Dagiti met sabali a natakawan, no la ketdi napasublida ti natakaw kadakuada, saandan nga agdarum pay. Adda met dagiti pagtagilakuan a no binayadanen ti nagtakaw wenno nagipuslit ti pateg dagiti tagilako, saandan nga ituloy ti darum maikontra iti mannanakaw.

Daytoy ti makagapu a saanen nga agdur-as pay ti kaso ti panagtakaw maikontra kadagiti suspek ket nawayanto manen dagitoy nga agtakaw.

Dakkel ti panaglagidaw ti nasao nga opisial kadagitoy a mapaspasamak agsipud ta saan metten nga agdur-as wenno agtungpal iti pannakadismis iti korte dagiti sumagmamano a kaso nga impilada. Kadakuada iti kapolisan, maysa daytoy a disnog iti  kampaniada maikontra iti krimen.

Kastoy met ti umarngi a mapaspasamak iti kampania ti kapolisan maikontra iti droga.

Segun iti daytoy nga opisial, adda dagiti natiliw dagiti polis a drug pushers bayat ti akto a panaglakoda iti maiparparit nga agas. Adda metten dagiti panagsukisok nga insayangkatda iti pagtaengan ti masuspetsa a nainbolbar iti illegal a panaglako iti droga a nakasamsamanda kadagiti sachet a naglaon kadagiti droga ken ramramit iti panagaramid iti droga. Sabali laeng dagiti natiliw dagiti police operatives iti buy-bust opera-tions nga insayangkatda maikontra iti sumagmamano a drug personality a nakasam-samanda kadagiti droga ken marked money.

Kinuna ti polis nga insaklangda dagitoy a tattao gapu iti panaglabsingda iti linteg, naidatag dagiti ebidensia a nasamsam wenno nakumpiskar dagiti polis iti ikutda iti babaen dagiti search operations wenno buy bust operations nga insayangkatda agraman dagiti marked money.

Ngem ti yan ti paitna, segun iti nasao nga opisial, adu kadagitoy a kaso ti saan a naipangato iti korte wenno no dimmanon man, saan a nagdur-as agsipud ta nadismisda.

Kuna daytoy nga opisial a sayang laeng dagiti oras ken sakripisio nga imburayda iti  surveillance  ken iti  panagimbestigada agsipud ta awan met la ti nagbambanagan dagiti indatagda a kaso.

Saantayo a mababalaw daytoy nga opisial. Nakasaksakit nga agpayso iti nakemda a kameng ti kapolisan a makakita nga ibasura laeng ti korte ti indatagda a kaso maikontra kadagiti drug pushers. Agladingitda la ketdi nga agtungpal nga awan ti pagmamaayan dagiti sakripisioda iti kampaniada mai-kontra iti droga.

Maibilang a heinous crime ti panaglakuan iti droga. Rumbeng koma nga agpanunot a naimbag ti maysa a tao a mainbolbar iti droga gapu iti kadagsen ti dusa a maipakat no mapaneknekan a nakabasol wenno nagsalungasing iti linteg.

Ngem apay nga adu latta dagiti mainbolbar iti panaglakuan iti droga? Apay a kasla awan ti panagbuteng dagitoy?

(Adda tuloyna)

Comments are closed.