Footer

BANNER NEWS: Win-win solution: naingato ti franchise fee, plete ti traysikel

VIGAN CITY – Win-win solution.

Daytoy ti panangiladawan ti maysa a konsehal ditoy iti inaprobaranda nga ordinansa mainaig iti masingir a regulatory fees kadagiti lugan nga agbibiahe ken agpaspasada ditoy siudad.

Kinuna ni Konsehal George Villanueva a kasapulan dagiti programa ti city government dagiti resources, nangruna iti pannakaidur-as ti turismo ditoy siudad isu a naputar ti ordinansa a mangingato iti regulatory fees dagiti luglugan nga agbibiahe ditoy siudad a pakaibilangan dagiti traysikelan.

“No adu ti turista ditoy Vigan, dagiti met la traysikelan ti mabenepisiaran,” kinuna ni Villanueva.

Maysa kadagiti puntiria ti city government ti pannakaidakkel ti pamastrekan ti siudad tapno saan laeng nga agpampannuray iti internal revenue allotment para kadagiti nagkaadu a proyekto ken programana.

Inaprobaran ti sangguniang panlungsod iti naudi a sessionda ti draft ordinance a  maipangato ti regulatory fees a pakairamanan ti mayor’s permit, registration fee, garbage fee, sanitary inspection, seminar fee ken sticker para iti transport sector a pakaibilangan dagiti traysikel, kalesaan, dyipan, van, minibus ken bus nga agbibiahe iti siudad ti Vigan para iti pannakapasayaat ti industria ti transportasion ditoy.

Sagudayen ti ordinansa a maingato ti franchise fee dagiti tricycle for hire ditoy siudad iti P600 ket maipangato tunggal tallo a tawen ngem saan a lumbes iti P1,000. Kagiddan met daytoy ti pannakaipangato iti P1 ti plete ti traysikel nga agbibiahe iti las-ud ti teritorial a hurisdiksion ti siudad ti Vigan.

Sakbayna, nagdalan ti ordinansa iti napaut a diskusion kalpasan a kinontra ni Konsehal Franz Ranches daytoy idinto a kinunana a saan koman a “patolan” dagiti traysikelan, kalesaan, dyipan, van, minibus ken bus, agsipud ta dakkel ti development fund ti gobierno ti siudad idinto a bassit laeng ti mapastrek iti pannakaipakat ti baro a regulatory fees kadagitoy a luglugan.

Kinuna ni Ranches a ti ketdi koma pasayaaten ti gobierno ti siudad ti panagkolektana kadagiti buis a pakairamanan ti realty tax a di ket “nayonan ti baklayen” dagiti traysikelan, kalesaan, dyipan, mini-bus, bus ken van.

Agdagup iti P86 milion ti nailatang para iti development fund ti gobierno ditoy idinto a mapattapatta nga agdagup iti P1.3 milion ti mapastrek kadagiti regulatory fees a masingir kadagiti luglugan.

Dagiti sumaganad ti naaprobaran a pakadagupan dagiti regulatory fees a bayadan dagiti luglugan nga agbibiahe ditoy Vigan: kalesa – P490.00; tricycle – P560; public utility jeepneys – P850.00; GT vans – P950.00; mini-bus – 850.00; bus – P1,000.#