Footer

Dayag ti Sinait ti Saniata ti Ilocos Sur 2011

VIGAN CITY. Nakoronaan kas Saniata ti Ilocos Sur itoy a tawen ni Dorothy Joy Pagurayan bayat ti pageant night a naangay iti Plaza Salcedo ditoy siudad idi Pebrero 5.

Kas gunggonana, inawat ti mutia ti Sinait ti premiona a P50,000, libre a trip iti Bangkok ken ibagiannanto ti Ilocos Sur iti sumaruno a pasalip para iti kina-Miss Philippines.

Napili pay ni Pagurayan kas Best in Gown a dinisenio ni Danica Damo a napili met a  Best Designer.

Napili met kas Saniata ti Ilocos Sur Tourism ti taga-Bangui, Ilocos Norte a ni Juliane Aurine Flores idinto a ni Diana Rose Santos manipud iti Batac, Ilocos Norte ti nangiyalat iti korona ti Saniata ti Ilocos Sur Environment.

First runner-up ni Diane Bernardo ti San Juan, La Union ken second runner-up ni Daniella Jose ti Caoayan.

Naited met iti gundaway ken ni Nancy Palomares ti San Ildefonso a mangirepresentar iti Ilocos Sur iti sumaruno a Ms. Tourism Intercontinental kalpasan a naited kenkuana ti Ms. Tourism Intercontinental Philippines award.

Iti minor awards, napili kas Miss Congeniality ni Daniella Jose; Miss Talent ni Diane Bernardo; Ilocanos’ Choice ni Jennylyn Deluria (Dagupan City); Best in Swimsuit ni Diane Rose Santos; Miss Photogenic ni Juliane Aurine Flores ken napili kas Star of the Night iti Talent Night idi Pebrero 1 ni Unique Fadul (Cabugao).

Sakbay ti koronasion, pinagsapata ni Vice Gov. Deogracias Victor “DV” Savellano dagiti opisial ti kabuangbuangay nga Ilocos Sur Designers Guild.

Kinuna ni Savellano a maysa metten daytoy a wagas tapno madiskobre ti talento dagiti local designers ken maitandudo dagiti lokal a produkto ti Ilocos Sur a maaramat ti panagdisenio.#