Footer

EDITORIAL: Suportarantayo gakat a mangingato iti penalty kadagiti carjackers

Nangipila ni Sen. Chiz Escudero itay nabiit iti gakat a mangingato iti multa iti panagitaray iti lugan iti sanguanan dagiti nagsasaruno a carjacking a napasamak iti pagilian itay nabiit.

Kas maibasar iti rekord ti kapolisan, idi napalabas a tawen, adda 761 a natakaw a motor vehicles ken 976 motorcycles. Nupay nababbaba daytoy ngem iti 2,134 nga average a kaso dagiti natakaw a  motor vehicles ken motorcycles manipud 2000 agingga iti 2009, dakkel latta daytoy a bilang a saan a rumbeng nga iyaleng-aleng laeng ti kapolisan.

Napapanawen ti gakat nga impila ti senador a mangipakat iti nadagdagsen a pannusa kadagiti agtatakaw kadagiti lugan. Nupay addan linteg a mangdusa kadagiti agtatakaw ken agitaray kadagiti lugan, iti panagkitami, saanen a maiyataday ti naituding a pannusa iti daytoy a panawen.  Iti sabali a pannao, arig inutil daytoy a linteg isu a saan nga italtalek dagiti sindikato nga adda iti likudan dagiti car thefts.

Iti babaen ti R.A. No. 6539, sumango dagiti makasuan iti carjacking iti minimum a 14 years agingga iti maximum a 17 years a pannakaibalud no awan ti nairagpin a kinadamsak ken pammutbuteng. No presente dagitoy, sumango ti akusado iti manipud iti 17 agingga iti 30 a tawen.

Ngem saan a magaw-at daytoy ti  kaatiddog ti penalty para iti reclusion perpetua tapno saan a makapagpiansa ti akusado para iti temporario a wayawayana. No reclusion perpetua, masapul a saan a nababbaba ngem 20 a tawen ken maysa nga aldaw ti penalty.

Iti agdama, mabalin dagiti matiliw a naglabsing iti panagkarnap iti lugan ti agpiansa iti manipud iti P100,000 agingga iti P180,000 tapno temporario a mawayawayaanda. Bassit unay daytoy a piansia ket nadaras laeng a paaddaen dagiti kameng ti sindikato tapno makaruarda iti pagbaludan ket nawayadanto manen a mangiwayat iti illegal nga aramidda.

Daytoy ti kayat ni Escudero a maliklikan.

Iti gakat nga impila ni Escudero, maingato ti penalty ti carjacking iti minimum a 20 agingga iti 30 a tawen no awanan iti nairagpin a kinadamsak ken intimidasion. No adda dagitoy a presente, maingato iti 30 a tawen agingga iti maximum a 40 a tawen a pannakaibalud.

Kinuna pay ni Escudero a no mapapigsa ti penal provision para iti carjacking, malapdan pay ti panagraira dagiti krimen ken dadduma nga illegal nga aktibidad kas iti gunrunning, panagtakaw, drug trafficking ken uray dagiti gun for hire a riding in tandem agsipud ta kasapulan dagiti perpetrators ti get-away vehicle a kaaduanna ti tinakawda manipud kadagiti adda luganda nga umili.

Suportaran koma dagiti agilinlinteg daytoy a gakat ni Escudero agsipud ta kumarkaron ti panagtakaw ken panagitaray kadagiti lugan saan laengen iti Metro Manila no di pay iti sapasap a pagilian.#