Footer

Head teacher, pinang-or ti polis iti bote

SALCEDO, Ilocos Sur – No nalaokanen ti dara iti nasanger, awanen ti paabak iti diskusion a pagramutan ti riri ken pannakadangran dagiti nakainom.

Kasta ti napasamak iti maysa a drinking session iti balay ti konsilman iti Barangay Poblacion ditoy nga ili a nakainbolbaran ti maysa a head teacher ken maysa a polis.

Iti naladaw a report manipud iti polis ditoy, bayat ti maysa a drinking session idi rabii ti Enero 31, pinang-or ni PO2 Brendo B. Daciego, kameng ti Salcedo police station, iti bote ti Red Horse ni Willie Tome y Alcantara, 48, naasawaan, head teacher ti Victory Elementary School ken residente iti Barangay Poblacion, Salcedo, Ilocos Sur, a puon ti nakasugatan ken pannakaiyospital daytoy.

Naammuan iti report a sakbay ti insidente, iti agarup alas nuebe ti rabii ti nadakamat a petsa, aggiinom da Tome, kaduana da Barangay Councilman Virgilio Ugalde, Alvin Alcantara ken Ronnie Galao iti balay ni Ugalde idi simmangpet da Daciego ken maysa a Tony Reyes ket nakitiponda iti grupo.

Mapapati a bayat ti panaggiinomda, nagbalin a nabara ti panagdinniskutir iti nagbaetan da Tome ken Daciego ket pinidut ti polis ti awan naggianna a bote ti Red Horse sana impang-or iti ulo ti biktima.

Naitaray ti biktima iti Salcedo District Hospital tapno maagasan ti sugatna.

Kabayatanna, nagtungpal iti ospital ti maysa a baro gapu ti pannakatagbatna bayat ti maysa a drinking session iti Barangay Calungbuyan, Galimuyod, Ilocos Sur idi Pebrero 8.

Nainaganan ti natagbat a ni Arnel Domingo y Remedillo, 29, baro, idinto a nabigbig ti suspek a ni Arsenio Agunan, 60, balo, karpintero, agpada a residente iti nadakamat a barangay.

Segun iti panagimbestiga dagiti polis ditoy, bayat ti drinking session iti pagtaengan ti suspek, mapapati a kinarit ti biktima ni Conrado Dagsi ket inanawa ti suspek dagiti dua.

Mapapati a ti suspek ti nangibaw-ingan ti biktima iti pudotna ket kinaritna daytoy. Saanen a nakateppel ti suspek ket nangala iti bolo sana tinagbat ti biktima a nakadunoran ti makannawan nga ima ti naud-udi.

Naitaray ni Domingo iti Rasonable Hospital iti Candon City idinto nga inaresto dagiti nagresponde a polis ni Agunan.#

Comments are closed.