Footer

KOMENTARIO: Dagiti anek-ek ti kapolisan (Tuloyna)

Adda sumagmamano a teoria no apay a kasla awan ti panangipirpirit dagiti drug personalities iti polis kasta metten iti linteg wenno iti hustisia.

Umuna, naturedda nga agaramid iti maikaniwas agsipud ta adda mangpatpatangken kadakuada. Mabalin a dakkel a tao, wenno nangato nga opisial ti militar wenno polis.  Saanen a nakadidillaw nga adda dagiti dadakkel nga agtuturay wenno opisial a nainbolbar iti drug trafficking wenno pushing. Dakkel daytoy a negosio ken pamastrekan, ket atiddogen dagiti ramayna a simrek  kadagiti kangrunaan a sanga ti gobierno ken uray iti militar ken kapolisan.

Pagarigan dagiti mararaut a shabu tiangge, kasano a maipasdek dagitoy iti kaarigna wangawangan ti agong ti kapolisan nga awan ti pannakaammoda? Saan a nakappapati a maiwaywayat dagiti drug trade no awan ti nalimed a “bendision” manipud iti protector a posible a maysa a nangato nga opisial wenno agtuturay.

Maikadua, saanda nga agpangadua iti dakes nga aramidda agsipud ta uray maisaklangda iti korte, adda dagiti piskal ken hues wenno abogado a mangsalaknib ken mangtulong kadakuada tapno saan a dumur- as ti kaso. No matiliw ti maysa a drug pusher, dagus met laeng a makaruar agsipud ta naparpardas pay ngem kimat nga adda abogado a mangpiansa kenkuana. No napigsa ti ebidensia, adu dagiti panglakagan tapno aguyas a kasla pagong ti kaso ket agtungpal a maipaigid daytoy iti suli agingga iti malipatan. Iti panagpaut ti kaso, nawaya latta ti drug personality a mangisayangkat iti illegal nga aramidna.

Makunami met a no adda man dagiti nainbolbar nga agtuturay, polis, militar, piskal ken hues, kayariganda laeng iti itta a nailaok iti nadalus a bagas. Ngem dagitoy nga igges ti mangdaddadael iti imahe iti nakaikappenganda a sektor. Dagitoy ti mangpalpalaad iti nadalus a nagan ti pagpapaayanda nga ahensia.

Ngem iti sabali a bangir, maysa a hues ti nagkuna a saan koma nga isuda ti pakaituduan ti pammilaw no dismisenda ti naisaklang a kaso ti maysa a natiliw a drug pusher.

Segun kenkuana, maysa a makagapu ti pannakadismis ti kaso dagiti drug pusher ti saan a panangsurot dagiti polis iti umisu a proseso iti panangisayangkatda iti panagsukisok wenno iti buy-bust operation wenno iti kinakurang ken kaawan ti dagsen dagiti ebidensia nga idatag ti kapolisan tapno agdur-as ti kaso.

Innayonna a maladingitanda met iti panangdismisda iti kaso gapu iti adu a biag a perdien dagiti akusado no siwayawayada manen nga agsalungasing iti linteg, ngem kapilitan nga ibasurada ti kaso gapu iti teknikalidad ken panagliway ti kapolisan a mangsurot iti umisu a proseso.

Kinapudno, nabayagen dagitoy a panagtitinnudo dagiti kangrunaan nga adigi ti hustisia. Ngem adda met linteg a sursurotentayo. Istrikto ti linteg. Kuna ti linteg a masapul a maibilang ti maysa nga akusado nga inosente agingga iti saan a makedngan iti korte a nakabasol. Kalinteganna dayta a masapul a raemen ken saan a rabngisen.

Ngem iti biangmi, kasapulanen ng ad-adda pay a mapaingetan ti linteg maikontra kadagiti mainbolbar iti panaglakuan iti droga. Maidagdagsen koma ti piansa dagiti matiliwan nga agikut ken aglako iti droga. Iti agdama, nalag-an unay ti piansa a maipakat iti naglabsing ket laklakaen laeng ti matiliw a drug pusher a paaddaaen. Maigunamgunam pay nga uray strike two laeng a matiliwan ti maysa a drug pusher ken uray no maysa laeng a gramo ti makumpiska iti ikutna, saanen a makapagpiansa pay, saan a kas iti agdama nga adda pay dagiti madamag nga agsasarutsot a matiliw ngem agsipud ta gramo laeng ti matiliw iti ikutda, nadarasda met a makapagpiansa ket ituloyda manen ti illegal nga aktibidadda.

Agpayso, istrikto ti linteg, ngem anian ta adu dagiti abutna a lumsotan dagiti agsalungasing iti linteg. Maaramidda dayta babaen ti tulong dagiti de kalibre nga abogadoda. Ta saan a malibak a dakkel a negosio ti panaglakuan iti droga ket kabaelan dagitoy ti mangala iti serbisio dagiti nalaing nga abogado a mangilusot kadakuada.

Malagidaw ditoy no apay nga adda dagiti abogado a saan nga agpangadua a mangsalaknib kadagiti drug users, drug pushers ken traffickers iti baet nga ammoda wenno nadagsen dagiti pammaneknek maikontra kadakuada mainaig iti illegal a panaglakuan wenno panagaramat iti droga.

Nakaladladingit ngem kapaliiwan nga adda dagiti sumagmamano nga abogado a nangipalladawen iti etika ken ti sinapataanda a pagrebbengan ket rinimbawanen ti kinapuskol ti maipapetpet kadakuda uray iti sanguanan ti kinapudno nga adu a biag ti nadadael gapu laeng iti pannakailuodda iti maiparparit a droga.#