Footer

Paraangan ti balay, napuruakan iti granada

BANTAY, Ilocos Sur – Nabuong ti sarming ken nadadael ti ridaw ti maysa a balay idi bimtak ti granada nga impuruak ti maysa a lalaki idiay barangay Ora Centro ditoy nga ili idi rabii ti Pebrero 7.

Nagresponde dagiti polis ditoy kalpasan a nakaawatda iti tawag iti telepono manipud iti maysa a Merlina Cortez y Petate, residente iti nadakamat a barangay, nga adda bimtak a granada iti las-ud ti paraanganda ket iti insayangkat a panagimbestigada, naammuan a maysa a residente ti nasao a lugar a nainaganan  Armando Palacpac, 40, naasawaan, ti nangipuruak iti granada sumagmamano a minutos kalpasan ti mapapati a panagsaosaona iti sanguanan dagiti sumagmamano a lumugar iti barangay.

Segun iti inbestigasion, sakbay ti insidente, aggiinom ti grupo da Joel Petate, Louie Ragadi, Placido Petate, Jr., Jomar Petate, Michael Bautista ken Israel Petate iti pagtaengan ti naud-udi idi immasideg iti ummongda ni Palacpac sa nagibalikas iti saan a nasayaat.

Kalpasan iti sumagmamano a darikmat, nakita ti grupo ti suspek a nakaiggem iti granada a kellaatna nga impalladaw iti compound ni Merlina Cortez ken bimtakan daytoy.

Nabtak ti sarming a tawa ti balay  kasta a nadadael ti ridaw a naaramid iti galba gapu kadagiti naibunubon a shrapnel.

Sinawar dagiti polis ti suspek a naglibas kalpasan ti insidente ngem saanda a nasapulan.

Agtultuloy ti inbestigasion ti polis mainaig iti pammomba.#