Footer

SARITA: Katrina (Maudi a paset)

MALEM ti Biernes. Nasapa a nalpas ti mitingmi. Diak a dagus a nagawid. Nagkitakami ken ni Katrina iti Fabito’s Farm and Resort iti kabangibang nga ili. Dinagasko iti pagadalanda.

“Ania ita ti planom?” sinaludsodna. Addakami iti cottage nga inabanganmi.

“Mariribukanak pay laeng,” impudnok. “Siguradoka kadi nga agdadagsenka?”

“Diak ammo. Ngem ita laeng a di regular ti period-ko.”

“Idawdawatta laengen a palso ti atapmo. Mabalin a na-delay-ka laeng.”

“Sapay la koma.  Didak la ketdi mapakawan idiay balay…”

Ulimek.

“No pumudno man ti atapko,” isuna met laeng ti nangburak iti ulimek, “daytoy ti tandaanam: diak kayat a pairegreg no kastanto man ti planom.”

Apagapaman ti pannakakellaatko. “Uray kasano kadakkel ti nastrekta a nagbasolan,” impatibkerko,  “diak kayat a risuten babaen ti maysa pay a basol.”

Napaisem. “Agyamanak…”

“Kat, pudno kadi nga ay-ayatennak?” pinerrengko.

“Ted… dimo koman a duduaen pay,” kinunana a nakalanlanay dagiti matana. “Diak koman inted ti aminko kenka.”

“Ngem basol ti ar-aramidenta.”

“Ammok. Ngem mapabasolnak kadi no kasta la unayen ti panangipategko kenka?”

Napaumelak. Bulsek ni ayat?

NADLAW ni baket ti pannakaikulkulengko kadagiti simmaruno nga aldaw. Addakami iti salas, tultulongannak nga ag-check kadagiti exam.

“Adda kadi parikutmo, ‘Pa?” sinaludsodna.

“Awan, ‘Ma,” inngilangilko.

“Maikatlon nga aldaw a nakaul-ulimekka. Kasla adda nakaun-uneg a pampanunotem.”

“Bannogko la siguro…”

“Saan. Adda la ketdi pakaburburiboram.” Inabaynak, sidudungngo a rinakusnak.

“Awan, ‘Ma,” impettengko.

“Dinak sa met ikabkabilangan nga asawa, ‘Pa?”

“Sika met, ‘Ma,” inawidko ket naglantip dagiti bibigmi.

“Ala, adda kenka no dimo ibaga ti pakariribukam,” kinunana kalpasanna. “Ngem laglagipem, ‘Pa, nga addaak laeng ditoy nga asawam.”

“Wen, ‘Ma…”

“Kayatko a naragsakka a makitkitak, ‘Pa, tapno matawid ‘toy anakta ti kinaguapom,” innalana ti imak nga inyapros iti tianna.

Nariknak ti panagkuti ni baby.

“Ne, nangngegnakan sa met, ‘Ma?”

“Siempre, a,” inyisemna. “Kuna ngarud dagiti sikologo a no kayatmo a nalukmeg ken nasingpetto ti anakmo, rugiamon a kasarita uray adda pay laeng iti uneg ti tianmo.”

Nakonsensiaak la ket ngarud.

KASLA nagdissuor ti sibubukel a lubong kaniak iti in-text ni Katrina kadayta nga aldaw ti Lunes a kaserserrekko iti pagadalan. Pudno kano nga agdadagsen!

Kasano daytoyen?

Ammo kdin dgt prentsmo? in-text back-ko.

Wen. Ksta unay a pung2tda. Nkpupokak ita 2y cledko.

Imbgam a xak ti amana?

Saan.

Nakaangesak iti nalukay. Ngem apagbiit laeng ta dimmagsen met laeng idi malagipko ni baket. Kabulananna pay met!

Apay ngata a di impudno ni Katrina a siak ti ama ti sikogna?

Nagpakopiaak lattan ta awanen ti mood-ko nga agisuro.

Ballikidak a ballikid iti iddak iti karabianna.

“Apay a dika makaturog, ‘Pa?” nakadlaw ni baket.

“Saan ngarud, ‘Ma,” kinunak. “Alimbasagennak…”

Inarakupnak. Nariknak ti ayatna.

Nakonsensiaak. Ania daytoy a naaramidko a babak?

Kinontakko ni Katrina iti kabigatanna. Ngem out of coverage! Ania ngatan ti napasamakna?

Mangal-aldawak iti office-mi idi timmawag ni baket. Agawidak la kano nga agawid.

“Apay?” inamadko apaman a nadanonko iti siledmi.

“’Toy tianko, ‘Pa, di agpakatalna,” kinunana. Sarsarapaenna. Agdiwdiwig pay iti sakit.

Intarayko iti ospital. Awan ni tatang iti bangir a balay ta napanna innala ni nanang idiay ili a paglakuanna iti natnateng.

Intulnogda a dagus ni baket iti delivery room apaman a nakitada ti idiarna nga annay nga annay.

Ngem nasuroken a maysa nga oras, di met laengen agpasngay ni baket. Agtutukelen ti ling-etko a pagna a pagna iti pasilio ti ospital. Madanaganakon.

Ngem nakaangesak met la iti nalukay idi makitak ti doktor a rimmuar iti delivery room.

“Congratulations, Mister!” kinunana. “Lalaki ti anakyo…”

“Agyamanak, Dok,” nakunak. Tumrem ta tumrem lattan dagiti luak.

“Yurayyo laengen dagiti agina iti OB ward.”

Immuna nga inyeg ti nars ti anakmi ken ni baket. Nakalunglungpo! Inap-apungolko iti ragsakko.

Adda maysa a kaduami iti kuarto. Diak mairupaan ta nakasikig iti diding a matmaturog. Agpupuraw. Awan bantayna.

Simmaruno nga inyegda ni baket. Nakasamsam-it ti isemna. Apaman a naaprosanna ti anakmi, inturognan.

Isu met a nagkuti ti kadua ni baket a pasiente. Nakariingen. Naglikig a simmango.

Anian a kigtotko idi malasinko. Ni Katrina!

Natarantaak. Nagtalatalangkiawak. Awan tao. Inrikepko ti ridaw.

Inasitgak. Langana met ti naklaat.

“Ania ti napasamak, Kat?” inamadko iti nakapsut a timek. “Dagiti bantaymo, yanda?”

“Rimmuarda,” nakapsut a timekna. “Napanda gimmatang iti prutas a kanek. Napan met ni tatang nangala iti kuarta a pagbayadmi ditoy ospital.”

“Ania ti napasamak?” inulitko.

“Naalisanak. Naikaglisak iti suelo…”

Dios-a-manangngaasi!

“Impudnom kadin a siak ti…?”

“Saanen a rumbeng. Nautobko a nasaysayaat laengen nga agtalinaed a palimed ti maipapan kadata.”

“Kat…”

“Ammok… pannusa ti Dios daytoy a napasamak. Aklonek ti amin. Ammok itan ti ar-aramidek.”

“Ania ti kayatmo a sawen?”

“Napasamak dagitoy tapno makapagpanunotta, Sir…”

Sir?

“Dika agdanag, Sir, ta dikan riribuken. Diak kayat a siak ti pakaigapuan ti pannakarakrak ti pamiliam. Nagbalinka a paset ti biagko. Ket agtalinaedka a kanayon iti kaunggak…”

“Agyamanak, Kat,” pinetpetak dagiti dakulapna. “Naindaklan ‘ta ayatmo. Sapay la koma ta makasapulka iti pudpudno a mangayat kenka.”

“Ikarim koma nga ayatem dagiti aginam…”

“Namnamaem, Kat…”

“Agbalinka koma metten a natibker, Sir, iti sango dagiti adu pay a sumangbay a Katrina iti dalanmo a kas mannursuro.”

“Dika agdanag. Agbalinak a natibker gapu kadagiti aginak,” inagkak ti dakulapna. “Agyamanak…”

Apaghusto nga agmulagat ni baket idi makatugawak iti iking ti katreda nga agina. Inarakupko. Iti suli dagiti matak, naimatangak ti nasam-it nga isem ni Katrina.

Napaluaak laengen.#

Comments are closed.