Footer

TARAON TI PANUNOT: Ni Victor iti sanguanan ti sulisog (Umuna a paset)

Sulisog. Kadagiti naglabas a saritatayo, intay imparang ti maysa a kita ti sulisog babaen ti lasag. Ita,  adtoy ti sabali pay a kita ti sulisog a manmanon wenno mabilbilangen a maitebbag. No lumba koma iti tinnarayan, adayon ti nangitarayan daytoy a kita ti sulisog. Nupay kasta, saan pay a makuna a rumimbawen ta adda pay laeng dagiti mulinaw a puso a mangibaybayog ti kinalinteg ket agtultuloy ti pannakidangadangda agsipud ta pagaammoda nga isuda ti agballigida iti kamaudiananna. Ta agnanayonto latta nga agballigi ti kinalinteg.

Iti agdama, gagangayen a mapaspasamak ti graft and corruption kadagiti amin nga opisina ti gobierno. Kas iti red tape. Nupay adda met linteg nga anti-red tape a naipasa idi 2007 wenno ti Republic Act No. 9485, kasla met kalukneng ti cotton candy ti pannakaipakatna. Isu a napanunot ni party list representative Bernadette Herrera Dy nga ingato iti  P1,000,000 manipud iti P100,000 ti multa ti asino man a matiliw nga agsalungasing iti red tape. Naipila daytoy kas House Bill No. 3905.

Adtoy ngarud nga inkam iparang kadakayo ti maysa pay a makapikapik a pakasaritaan mainaig iti nasao a tema.

Iti uneg ti opisinada, napasnek ni Victor a mangpalpalabas kadagiti papeles iti lamisaanna idi nagkiriring ti telepono.

“Hello, good afternoon…”

“Victor, ni Mr. Ang daytoy…”

“Apay nga immawagkayo, Mr. Ang?”

“Nalipatam kadin ti ibagbagak kenka, Victor?”

“Ti maipapan ti kontrata, Mr. Ang?”

“Korek..!”

“Nalpasen ti pangngeddengko, Mr. Ang.”

“Dumngegka a nalaing, Victor. No siak ti pangitedam iti kontrata, ikkanka iti kinse porsiento. Madika pay?”

“Ha? K-kinse p-porsiento?”

“Wen. Di kad aggatad ti minillion ti proyekto? Pues, dakkel ngarud a gatad ti umay kenka.”

“Diak maaramid, dayta, Mr. Ang. Naiwaragawagen ti bidding ti nasao a proyekto.”

“Uray pay. Sika ti pangulo ti Supply and Property Management. Patiek a kabaelam a lutuen ti bidding. Lutong makaw, ha-ha-ha!”

“Mr. Ang, dinak koma sulisogen, pangaasim.”

“Okey, okey, Victor, tapno awan met ti makunam kaniak, maysa a million ti itedko kenka. Ibagam laeng no ania ti bank account a pangideposituanmi, ta ita met laeng, itedmin ti bagim!”

Saan nga inted ni Victor ti bank accountna. Ngem mariribukan a nagawid. Dakkel dayta a kantidad a mangburburibor kenkuana. Nadlaw ni Delia nga asawana ti saanna a panagtimtimek.

“Adda parikutmo? Ibagam a, ta pagtinnulonganta a solbaren.”

“A-awan, awan, Delia…”

“Kabisadokon ti ugalim, Victor. No kasta a dika matimtimek, adda la ketdi  dakkel a mangburburibor kenka. Sawem koma kaniak ta pagtinnulonganta. Iti rigat ken nam-ay, saan kadi nga agtinnulongta, lakay?”

“Adda mangsulsulisog kaniak….”

“Babai kadi?”

“Saan. Maysa a pabor para iti maysa a kompania. No pangabakek iti bidding ti kompania, ikkandak iti maysa a milion a pisos.”

Mariribukan ngarud dagiti agassawa a Victor ken Delia. Dakkel a gatad dayta maisaburno kadakuada a mainayon iti urnongda iti banko. Didanton marigatan nga agassawa a mangpaadal kadagiti annakda. Ngem rumbeng kadi nga isukatda wenno ilakoda ti prinsipioda iti biag?

Kinasarita ni Delia ni mamana.

“Maysa a million? Dakkelen a gatad dayta. Ngem dakkel met ti kaipapananna dayta, Delia, anak.”

“Ania ti kayatyo a sawen, mama?”

“Pinadakkeldakayo iti naimbag a sursuro. Pinadakkelkayo nga agbiag iti nasayaat a sursuro ken kababalin ken iti kinalinteg. Ammok a kasta met ti katatao ni Victor.”

“Mama, dayta ti yamanek unay kadakayo.”

“Pagtalinaedenyo ti kinataoyo iti imatang ti Namarsua. Saanyo a gamden dagiti banag a saanyo a pakairanudan iti panungpalan.”

(Adda tuloyna)

Comments are closed.