Footer

Tricycle fare hike, inaprobaran ti sangguniang panlungsod

VIGAN CITY – Kagiddan ti pannakaaprobar ti pannakaipangato dagiti regulatory fees a bayadan dagiti traysikelan, kalesaan, van, dyip, mini-bus ken bus, inaprobaran met ti sangguniang panlungsod ditoy ti draft ordinance a mangipangato iti plete dagiti traysikel nga agpaspasada ditoy siudad.

Kinuna ni Konsehal George Villanueva a nupay impangatoda ti franchise fee ti tricycle for hire, naipangato met ti plete tapno adda “pagabrotan” dagiti traysikelan.

Kinuna pay ti konsehal a nupay maysa daytoy a “sakripisio” iti biang dagiti traysikelan, kaarigna nagmulada nga apitendanto met la iti masakbayan.

Iti uneg ti siudad, agbalinen a P10.00 ti plete ti traysikel manipud iti P9.00.

Ngem segun ti maysa a residente, pinagbalin laeng ti ordinansa a legal ti P10 a plete agsipud ta saanen a suplian pay dagiti agpaspasada ti P10 no agplete ti pasahero.

Kasta met nga adda dagiti agpaspasada a nanginngina ngem P10.00 ti singirda iti plete kadagiti riding public.

Ngem kinuna ni Villanueva a saan koma nga agulimek lattan dagiti commuters iti panagabuso dagiti agpaspasada iti traysikel.

“Ireportyo dagitoy tapno maaksionanmi,” kinuna ti konsehal sana innayon nga imballaagnan kadagiti agpaspasada nga estrikto ti panangmonitorda iti panagabuso dagitoy.

“No maireportda nga agsingir iti nanginngina, mabalin a makansela ti prangkisada,” kinuna ni Villanueva.

Dagiti sumaganad dagiti kabarbaro a singir ti plete:

Poblasion agingga iti Nagsangalan, Capangpangan, San Julian Norte, San Julian Sur, Tamag, San Jose, Ayusan Sur, Ayusan Norte, Paoa, Bulala, Pantay Daya, Beddeng Laud, vice versa – P10.00; P8.00 no estudiante/senior citizen;

Poblasion agingga iti Rugsuanan, Purok a Bassit, Purok a Dakkel, Cabaroan Laud, Cabaroan Daya, Camanggaan, Bongtolan, Cabalangegan, Pantay Fatima, Pong-ol, Beddeng Daya, Salindeg, Barraca, vice versa – P11.00; P9.00 no estudiante/senior citizen;

Poblasion agingga iti Raois, Pantay Laud, vice versa – P12.00; P10 no estudiante/senior citizen;

Poblasion agingga iti San Pedro Norte, San Pedro Sur, Mindoro – P13.00; P11.00 no estudiante/senior citizen;

Poblasion agingga iti nagbeddengan ti Bantay, Sta. Catalina, Caoayan, vice versa – P10.00; P8.00 no estudiante/senior citizen;

Iti uneg ti poblacion area (Barangay I to IX) – P10.00; no estudiante/senior citizen;

Iti rabii, agbalin metten a P20.00 ti plete no agmaymaysa ti pasahero ken iti uneg ti poblacion area, P16.00 no estudiante/senior citizen; P15.00 no dua wenno nasursurok ti pasahero, P12.00 para estudiante/senior citizen;

Iti ruar ti poblasion, P30.00 ti plete no maymaysa ti pasahero, P24.00 ti estudiante/senior citizen; ken P20.00 no dua wenno nasursurok, P16.00 kadagiti estudiante/senior citizens.#