Footer

2 natay, 4 nadundunor iti nagsisina nga aksidente

CABUGAO, Ilocos Sur – Dua a tattao ti natay idinto nga uppat ti nadundunor iti nagsina nga aksidente a napasamak iti Sta. Lucia ken daytoy nga ili iti las-ud ti dua nga aldaw.

Naireport a natay da Andy Valledor y Valle, 53, naasawaan, welder, residente iti Barangay Labnig West, San Juan, Ilocos Sur; ken ni Antonia Hernandez y Calanno, 36, naasawaan, BIR officer, residente iti Barangay Quinsoriano, Sta. Cruz, Ilocos Sur idinto a nainaganan dagiti nadunor a da Froiland Sevilleja y Bun-aw, mannalon, residente iti Barangay Bonifacio, Cabugao; Rowel Ronque y Agabao, 25, baro, residente iti Barangay Bonifacio, Cabugao; Santiago Joven y Reyes, 59, naasawaan; ken dagiti agassawa nga Alecia Hader y Diata, 57, ken Florante Hader y Tabaldo, agpada a residente iti Barangay Burgos, Sta. Lucia, Ilocos Sur.

Iti aksidente iti Cabugao a napasamak idi agarup alas 6:00 ti malem ti Pebrero 14, naammuan iti inisial nga inbestigasion dagiti polis nga agpaabagatan ti Euro EM100 motorcycle a minaneho ni Sevilleja a nakiluganan ni Andy Valledor ket iti nagpikuran ti national highway a sakup ti Sitio Cabaroan, Barangay Bonifacio, mapapati a napukaw ti drayber ti kontrolna iti manibela ket nakidinnungpar iti nakasabatna a Honda motorcycle a minaneho ni Rowel Ronque.

Naitaray da Sevilleja ken ni Valledor iti Suero General Hospital ngem saanen a naidanon pay ti biag ni Valledor.

Iti met Pira Clinic and Hospital ti nakaitarayan ni Ronque para iti pannakaagas dagiti sugatna.

Kabayatanna, napasamak ti maikadua nga aksidente iti national highway a sakup ti Barangay Angkileng, Sta. Lucia idi agarup alas 10:10 ti aldaw ti Pebrero 15.

Segun iti report, agpaamianan ti Yamaha Mio a minaneho ni Antonia Hernandez, ti TMX Honda a minaneho ni Florante Hader, ken ti Euro motorcycle a minaneho ni Santiago Joven idi mapapati a kimmaut ti makasabatda a delivery truck iti liniada isu a nagmenorda a puon ti nakadungparan kadakuada ti sumarsaruno a 3-H minibus a minaneho ni Ernesto Manzano y Almiron, 39, naasawaan, ken residente iti Barangay Rubio, Galimuyod, Ilocos Sur.

Gapu iti pigsa ti pannungpar, natay a dagus ni Hernandez idinto a nagsagrap da Joven ken Hader kadagiti sugat iti nadumaduma a paset ti bagida ket naitarayda iti Sta. Lucia District Hospital.

Boluntario a simmuko ti drayber ti minibus iti police station ti Sta. Lucia.#

Comments are closed.